Legalizimet e patërhequra, Kadastra apel qytetarëve

Publikohet lista me emrat e qytetarëve, që nuk kanë tërhequr lejen e legalizimit për shkak të mungesës së kontakteve

Procesi i legalizimeve aktualisht po shkon drejt fundit. Por ndërkaq, në shumë prej drejtorive vendore të Kadastrës, janë krijuar një sasi leje legalizimesh të përfunduara, por të patërhequra nga qytetarët.

Kjo ka ndodhur kryesisht për shkak të mungesës së kontakteve telefonike apo adresore me këta qytetarë. Për sa më sipër, gazeta "Panorama" po publikon listën e këtyre objekteve të legalizuara, por të patërhequra për Drejtorinë Tirana Rurale- 1, e cila përmbledh zonat e Tiranës në Jug të qytetit, si edhe Nj. A. Dajt, Sauk, Farkë, Petrelë, Bërzhitë, Krrabë, Shkozë, Selitë dhe Zall- Herr. Qytetarët që e gjejnë emrin e tyre në këto lista, të komunikojnë me drejtorinë përkatëse për të tërhequr lejen e legalizimit.

Kadastra ka bërë afishimin publik për qytetarët, në zbatim të VKM nr. 1040 date 25.11.2020 "Për përcaktimin e rregullave të zbatimit të kritereve të legalizimit dhe miratimin e modelit të aktit të legalizimit, për ndërtime pa leje", për të konfirmuar se, kanë marrë në shqyrtim kërkesën e qytetarëve të mëposhtëm. Publikimi i kërkesave për afishim të subjekteve që po trajtohen nga ASHK bëhet për një periudhë 30- ditore. Për rastet kur afishimi i emrave përfitues nuk bëhet nga ASHK përkatëse, gazeta po sjell sot emrat e të gjithë familjeve që do marrin lejen e legalizimit për dosjet që janë shqyrtuar deri në 4 mars 2021. Sakaq, rikujtojmë këtu se vitin që shkoi janë bërë disa lehtësime në procedura për legalizimet. Më kryesoren përmendim se qytetarët nuk janë të detyruar të paguajnë taksën e infrastrukturës për t'u pajisur me leje legalizimi. Për të qenë më të qartë, nëse deri në vitin 2019 qytetarët pasi u kishte dalë emri për të tërhequr tapinë duhej domosdoshmërisht të paguanin taksën e infrastrukturës në bashki, në të kundërt nuk do mund të tërhiqnin dokumentin e legalizimit dhe as certifikatën e pronësisë. Por duke parë që ky rregull po stepte familjet të aplikonin për legalizime dhe as nuk po paguanin takës, qeveria vendosi ta heqë atë si detyrim për të marrë lejen e legalizimit, ama mbetet në fuqi si një taksë që duhet paguar. Gjithsesi, e mira është që nuk do ketë ndikim në procesin e legalizimit. Në këto kushte, Kadastra ka raportuar se pas marrjes së këtij vendimi mbi taksën e infrastrukturës numri i aplikimeve për legalizime është rritur ndjeshëm. Në këtë mënyrë, edhe Agjencia Shtetërore e Kadastrës në bashkëpunim me zyrat kadastrale nëpër bashki ka ecur në ritme më të shpejta për përfundimin e procesit të legalizimit sa më parë.