Rama shpërblen Bicin me drejtimin e Kadastrës
Largohet Artan Lame, i cili mbante këtë post pas riorganizimit të pronave
Artan Lame është larguar nga posti i Kreut të Kadastrës, ndërsa pritet që të zëvendësohet nga Dallëndyshe Bici, e cila do të prezantohet ditën e sotme. Bici deri tani ka mbajtur postin e kreut të Inspektoratit Kombëtar të Mbrojtjes së Territorit. Ende nuk është e qartë nëse kemi të bëjmë me një shkarkim nga ana e Kryeministrit Rama për kreun e Kadastrës, Artan Lame, por gjithçka pritet të sqarohet ditën e sotme. Bici vjen në krye të Kadastrës pas prishjeve të shumta të paligjshme në ndërtimeve në bregdet që IKMT i ka humbur në Gjykata. Në qershor të vitit 2021, Inspektorati Kombëtar i Mbrojtjes së Territorit, IKMT, nisi operacionin e koduar “Bregdeti ynë”. Operacioni i reklamuar nga Kryeministri Edi Rama kishte si qëllim të deklaruar prishjen e objekteve pa leje ndërtimi të ndërtuara gjatë vijës bregdetare dhe lirimin e hapësirave përgjatë plazheve në të gjithë vendin.
Bazuar në dokumentet e marra në përgjigje të kërkesave për informacion nga gjykatat administrative Tiranë, Vlorë, Shkodër dhe Durrës – të cilat mbulojnë territorin e prekur nga aksioni “Bregdeti ynë”, BIRN, gjeti se IKMT në katër vitet e fundit humbi gjysmën e çështjeve, në të cilat ishte palë.
Të dhënat tregojnë se IKMT humbi 79 nga 159 çështje që u shqyrtuan nga gjykatat administrative në vitet 20192022. Vendimet e shqyrtuara nga BIRN tregojnë se në shumë raste IKMT nuk paraqiti prova në Gjykatë për të dëshmuar paligjshmërinë e subjekteve të sanksionuara dhe në raste të tjera aktet e përpiluara prej inspektoratit u gjetën të pavlefshme. Drejtuesja e IKMT- së, Dallandyshe Bici, i tha BIRN në një përgjigje me shkrim se gjyqtarët përdorin standarde të shumëfishta në vendimet e tyre duke favorizuar subjektet. Ajo shtoi se shumë nga gjyqtarët që i kanë marrë këto vendimeve janë larguar nga procesi i vetingut. “Jemi përballur dhe me raste njëanshmërie apo favorizuese ndaj subjekteve kundërvajtës, për të cilat nga ana e gjykatës nuk janë administruar provat e disponueshme nga IKMT, në formën dhe mënyrën e duhur ligjore”, shkruan Bici. “Gjithashtu është fakt se shumë gjyqtarë të cilët kanë gjykuar në këto procese gjyqësore janë shkarkuar nga organet e vetingut për mospërmbushje të profesionalizmit dhe perfomancës së rolit të gjyqtarit apo dhe shkarkime për rrethana edhe më të rënda se këto”, shtoi ajo.