Vendimi i KQZ, Bardhi: Nuk do të ketë asnjë plotësim dokumentacioni
Deputeti demokrat, Gazment Bardhi, shprehet se dokumentacioni i dërguar në KQZ nga grupimi i Alibeajt është i plotë. Reagimi i tij erdhi pas vendimit të Komisionerit Shtetëror të Zgjedhjeve, Ilirjan Celibashi. Bardhi bëri të qartë se dokumentacioni nuk do të plotësohet pasi ai është dorëzuar i plotë. “Nuk do të ketë asnjë plotësim dokumentacioni sa kohë ai është dorëzuar i plotë. Deklaratat e KQZ s’kanë lidhje me ligjin, janë formalizim i një vullneti politika ekstraligjor. PD ka dorëzuar dokumentacionin e plotë ligjor për regjistrim”, theksoi deputeti Gazmend Bardhi. Më herët, Celibashi deklaroi se ligjërisht kreu i PDsë është Lulzim Basha. Autorizimi i dhënë prej tij sipas kryekomisionerit është i paqartë dhe kërkoi plotësim dokumentacioni. Për këtë la një afat kohor prej 48 orësh. Përfaqësuesi ligjor i grupimit të Sali Berishës në PD,
Ledio Nuraj, kërkoi në Komisionin Qendror të Zgjedhjeve që të mos vazhdohet loja politike për të regjistruar partinë në zgjedhje. Ai kërkoi zgjidhjen sa më parë të kësaj situate, për shkak të afateve dhe organizimit që duhet bërë për zgjedhjet lokale. “I bëj thirrje Komisionerit Shtetëror të Zgjedhjeve të mos bëhen lojë e një politike që lë një gjykatë apeli që të vendosë në 8 orë duke ushtruar ndikim të palogjikshëm te gjyqësori. Në Gjykatën e Shkallës së Parë Tiranë rezultojnë të depozituara aktet e Rithemelimit. Çdo veprim i bërë nga Komisioni i Rithemelimit ka qenë në përputhje me ligjin. Kërkoj që kjo çështje të zgjidhet sa më parë, pa i krijuar një dëm Partisë Demokratike dhe pa vonesa të mëtejshme për shkak të afateve dhe organizimit që duhet bërë për zgjedhjet lokale”, deklaroi ai. Kurse Indrit Sefa, përfaqësuesi ligjor i grupimit të Enkelejd Alibeajt, ka replikuar me atë të Partisë së Lirisë në mbledhjen e sotme të Komisionit Qendror të Zgjedhjeve. Ai tha se me ndryshimin e emrit nuk ndryshon historia dhe sipas tij është e qartë se kush i ka shërbyer Edi Ramës në të shkuarën. Pas debatit mes tyre ndërhyri kryekomisioneri Ilirjan Celibashi, i cili kërkoi shmangien e retorikës politike.