KQZ njeh Bashën si kryetar të PD: 48 orë kohë, plotëso kërkesës
Celibashi: Në perceptimin tim, Sali Berisha është kryetar i PD- së, por nuk ndryshon asgjë në përputhje me ligjin.
Kryekomisioneri Ilirjan Celibashi u shpreh se ligjërisht si kryetar i Partisë Demokratike njihet Luzim Basha. Duke qenë se sipas tij autorizimi i dhënë nga ai është i paqartë, kërkoi nga përfaqësuesi i grupimit Alibeaj, Indrit Sefa, plotësim të dokumentacionit dhe dha 48 orë kohë për këtë. Kjo u kundërshtua nga Sefa, i cili paralajmëroi ankim ndaj vendimit. Ndërsa përfaqësuesi i grupimit Berisha, Ledio Nuraj, kërkoi vënien në dispozicion të autorizimit të Bashës, pasi sipas tij aty mund të ketë elementë të falsifikimit. Komisioneri i Komisionit Qendror të Zgjedhjeve, Ilirian Celibashi, e cilësoi si të paqartë autorizimin e kreut të PD, Lulzim Basha, për të deleguar kompetencat te përfaqësuesi ligjor i PD- së, Indrit Sefa. Ky i fundit dorëzoi kërkesën e regjistrimit të Partisë Demokratike në KQZ. Sipas KQZ, bazuar në vendimin e Gjykatës së Apelit, të drejtën për regjistrimin e PD në zgjedhje e gëzon Lulzim Basha. Ky i fundit gëzon edhe të drejtën për autorizimin e palëve të treta, por sipas KQZ kërkesa ka mangësi në dokumentacion e paraqitur para këtij institucioni, duke mos qenë koherent me parashikimet në Kodin Zgjedhor. “Autorizimi s’është i qartë. Duhet të shënohet se autorizimi vlen për zgjedhjet e datës 14 maj, jo thjesht zgjedhjet e vitit 2023. Ka edhe një mangësi që lidhet me detyrimin personal të kryetarit të PD për të nënshkruar deklaratën. Basha personalisht duhet të nënshkruante deklaratën e moskryerjes së krimeve zgjedhore. Çdo kompetencë tjetër mund të delegohet te të tretë. Deklarata e kryetarit të partisë është
përgjegjësi dhe si përgjegjësi ajo nuk mund të delegohet, ndaj duke e konkluduar këtë arsyetim, vlerësoj që dokumentacioni i paraqitur nga përfaqësuesi i PD, z. Basha nuk është i plotë ndaj do ju jap 48 orë kohë për të bërë plotësimet e kërkuara. Mund ta pranoj që në perceptimin tim Berisha është kryetar i PD, por nuk ndryshon asgjë në përputhje me ligjin. Në referim do duhet të marr atë që një dokument zyrtar i prodhuar nga një institucion i ngarkuar nga ligji, siç është Gjykata, tregon një fakt të ndryshëm nga ajo që unë apo dikush tjetër perceptojmë. Duhet të marrim në konsideratë ato që thuhen në dokumente zyrtare. Për ta përfunduar, që të drejtën për të kërkuar e regjistrimin e PD si subjekt zgjedhor për 14 Majin bazuar në dokumentet zyrtare që i janë vënë KQZ e ka zoti Lulzim Basha. Ai figuron kryetar i PD- së, në pikëpamje të ligjit, të kuptimit dhe të interpretimit të dokumentacionit”, deklaroi Celibashi. Nga ana tjetër, përfaqësuesit e PD të “Rithemelimit” pretendojnë se regjistrimi i PD nga Lulzim Basha është ilegjitim. Përfaqësuesit ligjorë të grupit të Berishës paraqitën argumentet e tyre për dokumentacionin e
paraqitur duke theksuar se Lulzim Basha ka dhënë dorëheqjen nga posti i krye
tarit dhe anëtarësia është ajo që vendos për lidershipin. Nga ana tjetër, përfaqësuesi
i grupimit të Alibeaj, Indrit Sefa, tha se KQZ nuk mund të zhvillojë një debat politik
e gjyqësor pasi vendimi është dhënë tashmë nga Gjykata e Apelit.