Drejtuesit lokalë të Shkodrës kujtohen për shtëpitë e barit
Prefektja: Ka më shumë rrënjë të mbjella këtë vit! Drejtuesi i Policisë: Kultivuesit e shesin drogë edhe pranë shkollave
Kultivimi i kanabisit dhe shtëpitë e barit duket se janë kthyer shqetësim për autoritetet vendore të qarkut të Shkodrës.
Pas më shumë se 9 vitesh kur gjithë zona gëlon nga kultivimi masiv, ditën e djeshme drejtuesit e pushteteve të ndryshme lokale janë bashkuar dhe kanë paraqitur, sipas tyre, alternativa për zgjidhjen e situatës.
TAKIMI
Prefektja e Shkodrës, Majlinda Angoni, ka ngritur shqetësimin për shtëpitë e barit që ngrihen nga grupet kriminale dhe kërkon nga komunitetet që të mos tregojnë indiferencë por të nisin sensibilizimin. "Krahasuar me një vit më parë, kemi më shumë rrënjë të mbjella këtë vit. Për 102 rastet e evidentuara, janë referuar në prokurori 111 persona. Në 2021 janë 102 raste të kultivimit të bimëve narkotike. 191 raste në 2022. Më shumë rrënjë të mbjella. Për 102 raste, 25% e tyre janë referuar në prokurori, 111 persona", tha Angoni. Ndërsa Ervin Hodaj, drejtor i Policisë së Shkodrës, u shpreh se shitja e dozave të
drogës bëhet pranë ambienteve të shkollave ndaj e cilësoi të rëndësishme kontrollin e territorit.
"Një nga problematikat që kam hasur është prania e lëndëve narkotike, kryesisht kanabis në mjedise, rrugë dhe ambiente publike. Të rinjtë që
akuzohen për narkotikët shpesh arrestohen për vjedhje të vogla apo sjellje antishoqërore apo si shitës të dozave të vogla. Reaguam dhe do reagojmë fort në shitjen dhe përdorimin e lëndëve narkotike, sidomos në shkolla. Që nga fillimi i vitit kemi kapur e proceduar penalisht 30 shpërndarës narkotikësh, mosha mesatare 22 vjeç dhe më i riu 15 vjeç. Këta do të marrin dënimin që do i japë drejtësia dhe me shumë mundësi një pjesë e tyre do kthehen sërish rrugës e ne do bëjmë sërish punën tonë. Kjo ndodh nga prania e
lëndëve narkotike në ambientet ku jetojmë, punojmë dhe argëtohemi. Kjo ndodh se kultivuesit e grupeve kriminale e shesin drogën në shkolla e lokale për të nxjerrë fitime dhe për ironi të fatit këto mund t'i duhen për të paguar avokatin apo për të rehabilituar fëmijën nga droga që kultivon po vetë.
REZULTATET E POLICISË
Kemi përcaktuar objektiva konkrete për goditjen e kultivimit të kanabisit. Do reagojmë fort në reduktimin e shitjeve të lëndëve narkotike. Kemi ndaluar 30 shpërndarës narkotikësh. Kultivuesit e shesin drogën në shkolla. Në 2022 janë proceduar penalisht 7 inspektorë të shërbimit pyjor, 19 punonjës të OSHEE. Problemi
i kultivimit të kanabisit është përgjegjësi e përbashkët. Kapacitetet njerëzore të policisë janë në nivelin e duhur për të goditur fenomenin. Rezultatet e kanë treguar. Territori i vështirë i Dukagjinit dhe mos kontrolli i duhur nga institucionet e tjera bën që ky fenomen të jetë më i vështirë në këtë zonë", tha Hodaj. Takimi u zhvillua në zyrën e Prefektit, të Task- Forcës Vendore Antikanabis, lidhur me realizimin e koordinimit dhe bashkëveprimit efektiv të veprimtarisë së institucioneve qendrore në nivel vendor dhe të këtyre institucioneve me njësitë e vetëqeverisjes vendore, për parandalimin, goditjen dhe shkatërrimin e kultivimit të kanabisit.