KQZ nuk regjistron PD- në në zgjedhje, Celibashi: Kërkesa s’ka bazë ligjore
PD jashtë zgjedhjeve, Celibashi argumenton vendimin: mungesëKa dokumentacioni! Nuk është kapriço, por përmbushje e detyrimeve
Komisioni Qendror i Zgjedhjeve rrëzoi dje kërkesën e Partisë Demokratike të drejtuar nga Lulzim Basha për regjistrimin në zgjedhjet vendore të 14 majit.
Gjatë seancës së djeshme pati debate mes përfaqësuesit të grupit të Alibeajt, Indrit Sefa, i cili tha se me veprimet dhe mosveprimet e tij, Komisioneri Ilirjan Celibashi i ka sjellë një dëm të jashtëzakonshëm në PD. Grupimi i Alibeajt, pati afat 2 ditë për të dorëzuar dokumentacionin e plotësuar pasi Lulzim Basha, i cili figuron kryetar partie nuk ka firmosur deklaratën solemne se nuk do të kryejë krime zgjedhore. Dokumentacioni i plotësuar për t’u regjistruar në zgjedhje nuk është dorëzuar, me argumentin se Lulzim Basha nuk është më kryetar partie. Ndaj kryekomisionerit Celibashi nuk janë kursyer akuzat me pretendimin se po zvarrit një proces ligjor. Ndërkohë dy kërkesat e PDsë nuk e morën dritën jeshile as në KAS. Në një mbledhje me dyer të mbyllura, anëtarët e Komisionit të Ankimimeve dhe Sanksioneve vlerësuan qëndrimin e Ilirjan Celibashit për të kërkuar dokumentacion më të plotë për grupimin e Alibeajt si vendim të ndërmjetëm, ndërsa për grupimin e Berishës është përdorur si argument shtesë fakti që nuk legjitimohet.
ARSYET
Kryekomisioneri i KQZ- së, Ilirian Celibashi, sqaroi dje vendimin e tij për lënien jashtë të PD- së në zgjedhjet lokale të 14 majit. Para gazetarëve, Celibashi deklaroi se ndonëse e kupton rëndësinë e kandidimit të partisë më të madhe opozitare në vend, kjo nuk nënkupton shkeljen e ligjit dhe regjistrimin me çdo kusht. Celibashi shtoi se mangësitë në dokumentacion që e çuan në këtë vendim nuk janë kapriço, por përmbushje themelore e detyrimeve. “E kuptoj shumë mirë rëndësinë e faktit që partia më e madhe e opozitës duhet të marrë pjesë në zgjedhje, por kjo nuk do të thotë asesi se
duhet të marrë pjesë në zgjedhje me çdo kusht me çdo çmim, sidomos në kurriz të shkeljes së ligjit dhe nuk po flasim për një kapriço apo një detaj, por po flasim për një përmbushje thelbësore të detyrimeve që një parti ka në kuadër të kërkesës së saj për t’u regjistruar si subjekt zgjedhor. “Ndaj në kushtet kur deklarata nuk është sipas përcaktimeve të nenit 64, pika 2 shkronja e, ku deklarata solemne duhet të nënshkruhet nga kryetar, unë vlerësoj se kërkesa e PD- së për t’u regjistruar si subjekt zgjedhor, nuk ka bazë ligjore dhe nuk duhet të pranohet. Në përfundim, PD nuk mund të regjistrohet si subjekt zgjedhor, kam të drejtën të them se kjo vendimmarrje është në vlerësim ligjor të fakteve dhe në interpretim të bazuar në bindjen time për ligjet zgjedhore. Nuk ka absolutisht asnjë interes politik, veç atij të respektimit nga kushdo, qoftë edhe nga partia më e madhe e opozitës”, theksoi Celibashi. Por, vetë kryekomisioneri shprehet se PD si parti politike nuk e ka humbur afatin, si për t’u regjistruar si subjekt zgjedhor, ashtu edhe nëse do të marrë pjesë në një koalicion. Kjo pasi, siç shpjegon, kryekomisioneri kërkesa për t’u regjistruar në zgjedhje është bërë brenda afateve.