Rama paralajmëron tjetër rritje: Paga minimale do bëhet 45 mijë lekë, nuk e çojmë dot te 80 mijë lekë
Kryeministri u shpreh se nuk e kanë harruar premtimin për pensionistët Kreu i qeverisë u përgjigjet kritikëve: Përllogaritja nuk bazohet në dëshirat që kanë, por në produktivitetin ekonomik
Nga prilli, paga minimale shkon në vlerën e 40 mijë lekëve, ndërsa Rama vijon premtimin se do e çojnë në 45 mijë lekë në fund të këtij mandati.
Kreu i qeverisë, Edi Rama reagoi për kritikët e atyre që kërkojnë rritjen e pagës minimale në 70 ose 80 mijë lekë, duke thënë se përllogaritje nuk bazohet në dëshirat që kanë, por në produktivitetin ekonomik. Teksa përmendi inflacionin të shkaktuar nga lufta në Ukrainë që e ka vështirësuar zhvillimin ekonomik të shumë vendeve thotë se Shqipëria barazohet me Maqedoninë e Veriut, duke lënë pas Bosnje- Hercegovinën dhe Kosovën për rritjen e pagës minimale. Nga prilli, paga minimale shkon në vlerën e 40 mijë lekëve ndërsa Rama vijon premtimin se do e çojnë në 45 mijë lekë në fund të këtij mandati. Në një postim në “Facebook”, Kryeministri tha se rritja e kësaj page minimale do të riekuilibrojë piramidën e pagave pasi do të sjellë edhe rritje të pagës mesatare. “E kemi nisur nga vendi i fundit në rajon për nivelin e pagës minimale, ndërsa me rritjen e fundit ngjitemi në vendin e tretë barazi me Maqedoninë e Veriut, duke lënë pas Bosnjë- Hercegovinën dhe Kosovën. Do të bëjmë edhe dy rritje të tjera për ta mbyllur këtë mandat me pagë minimale 45 mijë lek, nga 38 mijë që ishte objektivi ynë elektoral, por që s’merrte parasysh inflacionin e luftës së Putinit për të gjunjëzuar ekonomikisht mbarë Evropën! Ndërkohë, kjo rritje përtej parashikimeve e pagës minimale imponon edhe rritjen e pagës mesatare për të riekuilibruar piramidën e pagave, çka do të bëhet njëkohësisht në muajin prill. Disa komentojnë se paga minimale duhet të bëhet 70 apo 80 mijë lekë, por përllogaritja e pagës minimale bazohet në produktivitetin ekonomik
dhe konkurueshmërinë, jo në dëshirat tona ( asnjë vend i rajonit nuk e ka një minimum të tillë). Çdo rritje artificiale e saj sjell me shpejtësi pasoja destabilizuese për ekonominë, punësimin, financat e vendit”, shkroi Rama. Ndërsa nga Elbasani ku uroi Ditën e Verës, Rama u shpreh se nuk e kanë harruar premtimin për pensionistët, për të cilët tha se është së shpejti do të jepet shpërblimi i radhës që do të mblidhet nga taksa e jashtëzakonshme që do paguajnë prodhuesit e energjisë. “Përtej thashethemeve jo vetëm që nuk e kemi harruar premtimin për t’u rishpërndarë pensionistëve një tjetër mbështetje speciale duke shfrytëzuar taksën e jashtëzakonshme të kompanive që prodhojnë energji. Taksa
mblidhet në prill dhe me t’u mbledhur taksa do të shikojmë menjëherë se si kryesorja në administrimin e atyre të ardhurave do të jetë për pensionistët”, tha Rama. Taksa për prodhuesit e energjisë u paralajmërua që në tetor të vitit të kaluar nga kryeministri Edi Rama, i cili tha se vendosja e taksës së jashtëzakonshme për prodhuesit e energjisë do të shkojë në ndihmë të pensionistëve. Sipas Ramës, eksportuesit e mëdhenj kanë përfitime të mëdha në një kohë inflacioni është në nivele shumë të larta, i shkaktuar prej luftës në Ukrainë. “Kemi hyrë në një nivel tjetër të kontekstit rajonal sepse me riadaptimin e TEC- it të Vlorës, përfshirjen e kompanisë amerikane me investimin për të lidhur tubacionin me atë të TAP- it, marrim një tjetër fuqi në vitet që vijnë. Kjo pjesa e energjisë elektrike duket si muhabet për kuriozitet pasi kur nuk ekziston si fakt në faturë, thonë që nuk është gjë. Por është një shpenzim shumë i madh. Jemi duke diskutuar për vendosjen e një takse të jashtëzakonshme për prodhuesit e energjisë. Duke ndjekur direktivën evropiane, do vendosim një taksë të jashtëzakonshme. Jo për të marrë një shumë të konsiderueshme fondesh në të ardhurat e shtetit dhe për t’i përdorur për asgjë tjetër përveçse për t’ua kthyer njerëzve në formën e mbështetjes financiare duke nisur nga pensionistët dhe familjet në nevojë. Në këtë përballje kaq të madhe, në këtë lloj mostër, ne duam deri në fund të jemi solidarë. I gjithë ai volum të ardhurash nga taksa e jashtëzakonshme do kthehet në mbështetje sociale dhe të rezistencës së këtij populli ndaj inflacionit të luftës. Nga ana tjetër do bëjmë çmos rritjen e pagave ta vazhdojmë në mënyrë të qëndrueshme. Ta vazhdojmë për të vazhduar të stimulojmë sa më shumë jo vetëm njerëzit që punojnë në sektorin publik, por edhe atë privat. Do e rrisim përsëri pagën minimale në mënyrë që dhe sektori privat të bashkohet”, theksonte Rama.