Rama: Jam optimist, do t’i zgjidhim të gjitha çështjet e lëna pezull me Greqinë
Hap ekspozitën në Athinë, Rama: Jam artisti më i mirë ndër kryeministra Kryeministri takon Presidenten dhe kryeparlamentin grek, Tasoulas: Mbështesim Shqipërinë në rrugën drejt BE- së
Zgjidhja e çështjeve të lëna pezull mes Greqisë dhe Shqipërisë, si dhe rëndësia e bashkëpunimit mes dy vendeve, por edhe mbështetja greke në rrugën drejt integrimit ishte fokusi i diskutimeve të Kryeministrit Edi Rama dje në Athinë me Presidenten dhe kryeparlamentarin grek.
Në takimin me Presidenten Katerina Sakelaropulu, dy udhëheqësit u angazhuan për të zgjidhur të gjitha çështjet e mbetura pezull mes dy vendeve. Pas takimit nuk pati asnjë deklaratë, por mësohet se Rama është shprehur optimist për zgjidhjen e çështjes së detit në Gjykatën e Hagës siç palët janë dakordësuar për t’ju drejtuar së bashku. “Jam shumë optimist se pikërisht në këtë klimë do të zgjidhim më së miri të gjitha çështjet e lëna pezull mes dy vendeve. Edhe dakordësia për t’ju drejtuar një pale të tretë për zgjidhjen e detit tregon se jemi në rrugën e duhur për t’i dhënë zgjidhje problemeve”, mësohet të jetë shprehur Edi Rama. Gjatë bisedës me drejtuesin e Parlamentit, u vlerësua roli i minoritetit grek, si dhe i komunitetit shqiptar në vendin fqinj. Kryetari i Kuvendit shprehu mbështetjen e Greqisë në rrugën anëtarësuese të Shqipërisë në BE. Në 40 vite që është pjesë e familjes evropiane, Tasoulas foli edhe për përfitimet që sjell të qenit anëtare. “Po të diskutojmë sot anën politike të marrëdhënieve tona në kuadër në këtë nivel që janë marrëdhëniet tona, qoftë ana organizative, qoftë ana frymëzuese do të na çojnë në frymëzimin e këtyre marrëdhënieve duke pasur si urë të pakthyeshme minoritetin grek në Shqipëri, dhe komunitetin shqiptar në Greqi. Në vizitën e fundit të Kryeministri grek në Dervician, që e shoqëruar zoti Kryeministër, u dëgjuan fjalë shumë të sakta për progresin e Shqipërisë, për prosperitetin e minoritetit grek në Shqipëri dhe për perspektivën evropiane të vendit tuaj. Të gjitha këto janë të identifikuara. Vetëm nga fondi i konferencës zoti Kryeministër, nga programi në fushën e bujqësisë këto 40 vite Greqia përfitoi rreth 200 miliardë Euro. Pra, me të drejtë vendi juaj synon ecjen drejt integrimit evropian. Me të drejtë vendi ynë mbështet rrugëtimin evropian të Shqipërisë. Me të drejtë të dyja vendet tona duke pasur ura lidhëse po ecin përpara. Me këto mendime, me konfirmimin dhe duke qenë i sigurt për përmirësimin e marrëdhënieve tona, për përmirësimin e jetesës së minoritetit grek në Shqipëri dhe përmirësimin e nivelit të jetesës në përgjithësi në Shqipëri ju uroj mirëseardhjen në parlamentin helen”, tha Tassoulas. Kurse kryeministri Rama u shpreh se marrëdhëniet mes dy vendeve janë shumë të mira dhe në përmirësim të vazhdueshëm. “Marrëdhëniet tona janë shumë të mira dhe në përmirësim të vazhdueshëm. Dëshira e dyanshme për t’iu forcuar këto marrëdhënie çdo ditë është shumë e madhe dhe baza e këtyre marrëdhënieve janë padyshim të dy popujt tanë dhe urat e forta mes nesh janë qoftë qytetarët grekë që jetojnë në Shqipëri dhe qytetarët shqiptarë që jetojnë në Greqi”, tha Rama. Mes të dyve u shkëmbyen disa dhurata ku nuk munguan as batutat. “Kjo është pasi zihen deputetët në parlament dhe kur të shkoni në darkë në shtëpi, kjo është vera ime. Është shumë e mirë pas seancave”, tha Rama. Takimeve të djeshme të kryeministrit Edi Rama u parapriu një ditë më parë çelja e ekspozitës së tij personale në Athinë. Siç pohon, kjo ishte hera e parë që e kombinon një vizitë pune me ekspozimin e veprave të tij, që u bë pallatin Zapion Megaron në Athinë. Rama në këtë rrëfim prej artisti- politikan nuk i kursen falënderimet për kryediplomatin Dendias dhe përsërit batutën e tij të preferuar për piktorin e vetëm kryeministër mes drejtuesve aktualë të shteteve në glob. “Unë jam artisti më i mirë ndër kryeministra dhe padyshim Kryeministri më i mirë ndër artistë. Kur vizatoj në zyrën time, vëmendja nuk është tek ajo çfarë bëj me duar, por i lë sytë të lëvizin bashkë me duart, ndërsa mendja është plotësisht e përqendruar te çështja që diskutohet me bashkëpunëtorët e mi ose te bashkëbisedimet telefonike ose teksa peshoj vendimet që duhen marrë kur jam vetëm”, theksoi Edi Rama. Për të parë ekspozitën nuk mungoi as Kryeministri Mitsotakis që pa mes punimeve të homologut të tij dhe piktura të bëra në letra zyrtare ku ishte dhe emri i tij.
“Marrëdhëniet tona janë shumë të mira dhe në përmirësim të vazhdueshëm. Dëshira e dyanshme për t’iu forcuar këto marrëdhënie çdo ditë është shumë e madhe dhe baza e këtyre marrëdhënieve janë padyshim të dy popujt tanë dhe urat e forta mes nesh janë qoftë qytetarët grekë që jetojnë në Shqipëri dhe qytetarët shqiptarë që jetojnë në Greqi”