PD bashkohet në Vaun e Dejës. Alibeaj mbështet Zef Hilën
Pas Elbasanit, edhe demokratët e Vaut të Dejës me një kandidat: Vetëm Hila është përfaqësuesi ynë zgjedhjet lokale
Ndryshe nga lidershipi i PD- së në qendër, demokratët në bazë po shkojnë drejt bashkimit.
Pavarësisht vendimit të Apelit, që riktheu vulën te grupi i Enkelejd Alibeajt disa degë të Partisë Demokratike zyrtare në rrethe janë duke konfirmuar kandidatë e Sali Berishës si kandidatë të tyre. Pas rastit të Elbasanit ku Luçiano Boçi siguroi edhe mbështetjen e grupit të Alibeajt, tashmë një tjetër kandidat do të mundësojë unifikimin e PD- së. Dega e Partisë Demokratike e Vaut të Dejës, gjatë mbledhjes së strukturave dakordësuan për të dalë në zgjedhjet e 14 majit me 1 kandidat, pavarësisht dy grupimeve të krijuara brenda partisë. Demokratët e grupimit të Alibeajt kanë dalë haptazi në mbështetje të kandidatit të Berishës, Zef Hila. Ishte anëtari i Kryesisë dhe kryesuesi i listës së Këshillit
Bashkiak për PD- në, Vau Dejës Gjon Marku, i cili bëri publik edhe këtë qëndrim duke vlerësuar rëndësinë e këtyre zgjedhjeve, por edhe domosdoshmërinë që PD- ja Vau Dejës të mbështesë kandidatin e primareve. Në përfundim të mbledhjes anëtarët e PD- së në Vau Dejës firmosën edhe një peticion drejtuar
Kryesisë së PDSH, që të marrë në konsideratë vendimin e tyre unanim për të mbështetur Zef Hilën në zgjedhjet e 14 majit. “Duke pasur në konsideratë deklaratën e kryetarit në detyrë z. Enkelejd Alibeaj që në këtë proces do të merren në konsideratë si kandidaturat e dala nga procesi i primareve të organizuara në vitin 2021, ashtu edhe procesi i primareve të organizuara në vitin 2022 nga Komisioni i Rithemelimit, konstatojmë se deputeti i zonës z. Zef Hila, është kandidatura e vetme që ka marrë mbështetjen me votë në të dy këto procese”, thuhet në një deklaratë të degës së demokratëve në bashkinë veriore të vendit. “Në emër të
PD- së Vau Dejës shprehim vullnetin tonë të plotë për të mbështetur z. Hila si kandidat unik të të gjithë demokratëve të Vau Dejësit për zgjedhjet vendore të 14 majit. Për shkak të kontributit dhe mbështetjes së tij në zonë, jemi të bindur se z. Hila është një kandidaturë fituese. Këtë propozim, kryesia e PD- së Vau Dejës do t’ia përcjell me shkrim z. Enkelejd Alibeaj, znj. Jorida Tabaku dhe z. Gazment Bardhi, si përfaqësues të organeve drejtuese të PD- së. Mbetemi të bindur që vullneti i strukturave drejtuese të PD Vau Dejës do të respektohet, në funksion të fitores së bashkisë dhe bashkimit të demokratëve”, mbyllet deklarata. Pavarësisht këtij momenti bashkimi, demokratët vazhdojnë të jenë të përçarë për shkak se përplasjeve të brendshme. PD e
Berishës hyn në garën e 14 majit në koalicionin ndërkohë që PD- së e drejtuar nga Enkeljed Alibeaj ka dalë me kandidatët e saj. Deri me tani, Partia Demokratike me në krye të komanduarin Enkelejd Alibeaj ka prezantuar kandidatët e saj për 16 bashki. Në ditën e dytë të takimeve, kryetari i komanduar i Partisë Demokratike Enkelejd Alibaj mblodhi krerët e degëve dhe më pas drejtuesit e degëve të PD- së së Tiranës. Takimet me strukturat e partisë vijnë një ditë pasi Alibeaj zhvilloi bisedime me mbështetësit e tij, deputetë dhe anëtarë të kryesisë. Dy ditë më parë Alibeaj deklaroi se PD- ja do të ketë kandidatet e saj për kryebashkiake dhe këshilla bashkiake në të 61 bashkitë. Në takime u propozua edhe kandidimi vetëm me këshilltare bashkiake.