KQZ regjistroi “Bashkë Fitojmë” në zgjedhje, Alibeaj ankim në KAS Padia e PD në Kolegj, caktohet relatori Blerona Hasa
Grupimi i Alibeajt, me përfaqësues ligjor Indrit Sefën dorëzoi dje në Komisionin e Ankimeve dhe Sanksioneve kërkesën për të shfuqizuar vendimin e marrë nga KQZ- ja për regjistrimin si subjekt zgjedhor të koalicionit “Bashkë Fitojmë”. Në ankesën e depozituar në KAS, thuhet se ky vendim duhet shfuqizuar pasi ende në aktet e depozituara rezulton si pjesë e marrëveshjes apo koalicionit, subjekti politik Partia Demokratike e Shqipërisë e përfaqësuar nga Komisioni i Rithemelimit. “Kërkojmë shfuqizimi i vendimit nr. 178, datë 18.03.2023 të Komisionerit Shtetëror të Zgjedhjeve “Për shqyrtimin e kërkesës për regjistrimin e koalicionit ‘ Bashkë Fitojmë’. ( BF) për zgjedhjet për organet e qeverisjes vendore të datës 14 Maj 20233 , thuhet në kërkesën e depozituar në KAS nga përfaqësuesi ligjor i grupit të
Alibeajt, Indrit Sefa. Sipas Alibeajt, kërkesa dhe marrëveshja e “Bashkë Fitojmë”, “përmbajnë referenca te Partia Demokratike e Shqipërisë, në kushtet kur kjo e fundit as nëpërmjet kryetarit të saj apo ndonjë personi tjetër të autorizuar nga ana e tij, nuk ka shprehur vullnetin për të qenë pjesëmarrëse në këtë koalicion”. “Marrëveshjes i mungon edhe një element tjetër i rëndësishëm që ka të bëjë me përcaktimin e numrit të kandidatëve nga secila parti politike. Në kushtet kur subjekti ‘ Komisioni i Përkohshëm i Rithemelimit’ është përjashtuar nga marrëveshja, mbetet e paqartë se cila parti politike do të propozojë kandidatët e koalicionit”, thuhet në ankimin drejtuar KAS. Sipas kësaj kërkese, grupimi i Alibeajt pretendon se emërtimi i palës tjetër si Partia Demokratike e Shqipërisë krijon konfuzion dhe është në shkelje të ligjit. Po ashtu, sipas tyre marrëveshjes së koalicionit i mungon përcaktimi i numrit të kandidatëve nga secila parti. Shorti përcaktoi relator të kërkesës ankimore Blerona Hasa. Kujtojmë se koalicioni i regjistruar në KQZ tashmë përmban 3 parti, pasi u vendos që Partia Demokratike me Sali Berishën nën cilësinë e kryetarit të përjashtohej. Po dje Kolegji Zgjedhor “rrëzoi” vendimin e komisionerit të KQZ- së, Ilirian Celibashi për të lënë jashtë zgjedhjeve të 14 majit partinë “Lëvizja Bashkë”. Partia me kryetar Arlind Qorin do të jetë përfundimisht garuese në zgjedhjet lokale duke fituar “betejën” ligjore. Ky vendim u mor gjatë seancës së djeshme nga Kolegji Zgjedhor pranë Gjykatës Administrative të Apelit. Në këtë formë u rrëzua vendimi i më hershëm nga KQZ- ja dhe KAS për mosregjistrimin e këtij subjekti.