RISITE NE KODIN RRUGOR
Shmangia e pranisë së tepërt të strukturave të policisë rrugore në akset rrugore në mënyrë që përdoruesit e rrugës të mos ndalohen disa herë në të njëjtin aks rrugor. Për këtë arsye në nenin 4 është propozuar që "Kontrolli i mjeteve në rrugët interurbane, kryerja e shërbimeve konsiston vetëm në identifikimin e shkeljeve me pajisje teknologjike dhe vetëm në ndalimin e shoqërimin e mjetit në një pikë kontrolli me kushte sigurie".
Është rritur mosha e drejtuesve të mjeteve të trasportit si autobusë, kamionë, etj. deri në 70 vjeç. Kështu në nenin 8 të projektligjit i cili ndryshon pikën 2 të nenit 114 të ligjit ekzistues parashikohet që: "Cilido, që drejton mjete me motor, nuk duhet të ketë kaluar moshën shtatëdhjetë vjeç, për të drejtuar autobusë, kamionë, kamionë me rimorkio, gjysmërimorkiatorë, artikularë të tjerë, të caktuar për transport personash dhe mjete me motor për transport malli".
Shtimi i disa masave me qëllim përgatitjen e personave të sapopajisur me leje drejtimi me qëllim për t'u dhënë atyre kohën e duhur për t'u ambientuar me rrugën. Kështu, në nenin 9 të projektligjit i cili ndryshon nenin 117/ 1 është shtuar parashikimi sipas të cilit: "Mbajtësit e lejeve të drejtimit të kategorisë B, në dy vitet e para të lëshimit, nuk u lejohet të drejtojnë mjete motorike me fuqi specifike, referuar masës bosh të mjetit, më të madhe se 55 kë/ ton. Për makinat hibride elektrike ose plug- in, kufiri specifik i fuqisë është 65 kë/ ton, duke përfshirë peshën e baterisë."
Lejedrejtimet e mjeteve të kategorive AM, A1, A2, A, B1, B dhe BE sipas grup- moshave, janë të vlefshme për 15 vjet, nëse janë lëshuar apo konfirmuar për persona deri në moshën 70 vjeç. Për personat mbi 70 vjeç konfirmimi i vlefshmërisë së lejes së drejtimit bëhet duke dorëzuar certifikatë mjekësore të lëshuar nga një prej organeve mjekësore nga e cila të rezultojë që zotëruesi i kësaj certifikate plotëson të gjitha kërkesat fizike e psikike të kërkuara.
Lejedrejtimet e mjeteve të kategorive C1, C1E, C, CE, D1, D1E, D dhe DE sipas grup- moshave, janë të vlefshme për 5 vjet, nëse janë lëshuar apo konfirmuar për persona deri në moshën 70 vjeç. Për personat mbi 65 vjeç, leje drejtimi e kategorive C dhe CE lëshohet për drejtimin e mjeteve, masa e përgjithshme e të cilave, me ngarkesë të plotë, nuk është më shumë se 20 tonë. Për personat mbi 65 vjeç, lejedrejtimi e kategorive D1 ose D, apo D1E ose DE lëshohet vetëm për drejtimin e mjeteve, për të cilat kërkohet pajisja me lejedrejtimi përkatësisht të kategorisë B ose BE. Lejedrejtimet e posaçme të mjeteve, lëshuar për personat me aftësi të kufizuara, të kategorive AM, A1, A2, A, B1, B dhe BE, janë të vlefshme për 5 vjet, nëse janë lëshuar apo konfirmuar për persona deri moshën 65 vjeç dhe 3 vjet për persona mbi 65 vjeç. Lejedrejtimet e posaçme të mjeteve, lëshuar për personat me aftësi të kufizuara, të kategorive C1, C1E, C dhe CE, janë të vlefshme për 5 vjet, nëse janë lëshuar apo konfirmuar për persona deri moshën 65 vjeç. Këto leje nuk rinovohen pas moshës 65 vjeç.
Ofrimi i mundësisë për përdoruesin e rrugës në rastin kur atij i hiqet leja e drejtimit të gëzojë të njëjtën lehtësi që tashmë e njeh Kodi Rrugor për lejet e drejtimit të lëshuara nga një shtet i huaj, që heqja e leje drejtimit të konvertohet me pagesën e një shume që është sa dyfishi i masës administrative maksimale të parashikuar për normën e shkelur.
Rritja e afatit në 30 ditë të lejes së qarkullimit për automjetet, motomjetet dhe rimorkiot e importuara përkohësisht ose të reja nga fabrika të blera për eksportim, që kanë përmbushur formalitetet doganore, kur duhet, dhe që i përkasin qytetarëve shqiptarë me banim jashtë shtetit ose të huajve që kalojnë nëpër Shqipëri.
Shpejtësia maksimale e lejuar për Autostradat nga 110km/ orë bëhet 130km/ orë, për autostradat të cilat garantojnë standardet përkatëse të sigurisë rrugore duke mundësuar një drejtim të sigurt të mjetit në shpejtësinë maksimale 130km/ orë.
Vendosja e parametrave të reja për sigurinë e fëmijëve në makinë, ku fëmijët deri në moshën 3 vjeç duhet të udhëtojnë të siguruar me sisteme të përshtatshme fiksuese të homologuara, të përshtatshme për peshën e tyre, në vendet e pasme të mjetit. Ata mund të udhëtojnë në vendet e përparme të mjeteve të kategorive M1, N1, N2 dhe N3, të siguruar me sisteme të përshtatshme fiksuese, me fytyre prapa, vetëm kur jastëkët e ajrit janë të çaktivizuara.
9. Rritja e lehtësive të përdoruesit të rrugës për rastet e parashikuara me gjobë, duke rritur kohën në dispozicion ( nga 5 ditë në 15 ditë) për të përfituar nga ulja si dhe duke rritur përqindjen e uljes së gjobës në rast të pagesës brenda afatit lehtësues nga 20% në 50%. Kështu, projektligji në nenin 20 që ndryshon nenin 203 i cili parashikon që "nëse arkëtimi i vlerës së gjobës nga kundërvajtësi bëhet brenda 15 ditëve nga dita që gjoba regjistrohet ose vendimi ka marrë formë të prerë, gjoba ulet me 50 për qind të vlerës".
10. Projektligji parashikon dhe disa rregullime të tjera që lehtësojnë përdoruesit e rrugës, si dhe harmonizojnë dispozitat e Kodit me legjislacionin në fuqi.