Nga lojërat e fatit te sigurimi i detyrueshëm ndaj tërmeteve, plani

Për ministrin e Ekonomisë zhvlerësimi i monedhave të huaja e rrjedhimisht forcimi i monedhës vendase tregon performancën e mirë ekonomike. E këtë, e mbështet me disa faktorë. "Forcimi i lekut është reflektim i forcimit të ekonomisë. Nëse kemi vetëm në 9 mujor 3.2 miliardë euro flukse hyrëse nga turizmi, sigurisht që kjo ndikon në forcimin e monedhës vendase, ashtu siç ka edhe një sërë fluksesh të tjera që shprehen në forcimin e monedhës vendase. Ne jemi një ekonomi e hapur, e ndjeshme ndaj zhvillimeve të partnerëve tanë tregtarë, ndaj zhvillimeve gjeopolitike që kanë dhënë efekt në atë sektor", tha Mete. Teksa foli për sigurimin e detyrueshëm të banesave nga tërmetet dhe tha se një draft do të jetë gati në tremujorin e parë të këtij viti. "Ligji është në diskutim, kemi një analizë të Bankës Botërore sa i përket primit nëse do të jetë bazik i unfiirkuar për gjithë vendin apo i ndarë në 2 apo 4 zona të vendit, të cilat reflektojnë nga njëra anë riskun sizmik dhe nga ana tjetër vlerën e banesave", tha ministri duke folur më tej për lojërat e fatit, që sipas tij duhet të shkojnë drejt formalizimit. "Një formalizim që duhet të jetë i kujdesshëm i kontrolluar dhe transparent. Besoj që ligji edhe pas diskutimeve në komision ka disa aspekte që shkojnë drejt kësaj qasjeje, duke pasur parasysh që të gjitha pagesat planifikohen të jenë vetëm përmes sistemit të pagesave. Bëhet fjalë vetëm për lojëra "online", digjitale, të kontrolluara. Janë shtrënguar kërkesat që të ketë operatorë me eksperiencë ndërkombëtare në vendet e BE- së dhe OECDsë, pra në vende të zhvilluara. Është diskutuar të ketë element gare, pasi numri i licencave është i kufizuar, në mënyrë që të jetë sa më transparente dhe rigoroze qasja në këtë drejtim".