Ish- të përndjekurit politikë, lista me dokumentet e reja për të tërhequr dëmshpërblimin

Vendimi, për ish- të dënuarit politikë që jetojnë si dhe trashëgimtarët e tyre ligjorë. Rastet e veçanta për tërheqjen me prokurë

Një paketë e re dokumentesh e miratuar me vendim qeverie ka hyrë tashmë në fuqi me qëllim për të përshpejtuar procesin e dëmshpërblimit të ish- të përndjekurve të regjimit komunist.

Ministria e Financave ka ndryshuar procedurat e ndarjes së pagesave, tashmë pa kritere përparësie e po ashtu edhe detajuar listën e dokumenteve që nevojiten për t'u depozituar rast pas rasti. Një udhëzim i Ministrisë së Financave, publikuar në fletoren zyrtare sheshon dallimet midis kategorive prioritare dhe ato jo prioritare duke parashikuar ndarjen në mënyrë proporcionale të të gjithë fondit të vënë në dispozicion për ish të dënuarit politikë, me kushtin e vetëm që vlera e përfitimit të mos e kalojë shumën e 1 milionë lekëve. "Në bazë të buxhetit vjetor të vënë në dispozicion, fondi i dëmshpërblimit të ishtë dënuarve politikë nga regjimi komunist do të ndahet në mënyrë proporcionale për të gjithë përfituesit, me kusht që kësti i dëmshpërblimit të mos jetë më i madh se 1 000 000 ( një milion) lekë", citohet në udhëzimin e ri.

PROCEDURA

Për të përmbyllur sa më parë listëpagesat e hapura prej vitesh me disa këste dhe që derimë tani ishin të ndara midis kategorive prioritare dhe trashëgimtarëve, qeveria ka ndryshuar kurs duke ndarë fondin në mënyrë proporcionale për çdo përfitues. I vetmi kriter që bën diferencën do të jetë vlera e dëmshpërblimit. Ata, të cilëve qeveria iu detyrohet deri në 1 milion lekë do të mund të dëmshpërblehen me një këst të vetëm, pavarësisht këstit ku kanë mbetur. E kundërta ndodh me ata që kanë shuma të mëdha për të tërhequr, të cilët do të vijojnë me këstet sipas radhës. "Për të gjitha subjektet përfituese parësore, kur vlera totale e dëmshpërblimit është mbi 8 000 000 ( tetë milionë) lekë, do të vijohet me pagesën e këstit pasardhës deri në shpërndarjen e plotë të shumës së miratuar. Në rast se vlera totale e miratuar për të gjithë përfituesit është deri në 1 000 000 ( një milion) lekë, shpërndarja e dëmshpërblimit do të kryhet me një këst të vetëm, pavarësisht fazës në të cilën ndodhet shpërndarja e dëmshpërblimit. Me kryerjen e pagesës së dëmshpërblimit, për të gjithë përfituesit, brenda këstit më të ulët, fillon pagesa e këstit pasardhës. Ky mekanizëm do të përsëritet deri në shpërndarjen e plotë të shumës së dëmshpërblimit financiar", detajohet në udhëzimin nr. 30, datë 07.12.2023.

Për të dënuarit e regjimit që jetojnë, pagesat parashikohet të kryhen me një këst të vetëm në një llogari në emër të tij, përmes një prokure të posaçme ku të specifikohet tagri ligjor për tërheqjen e shumës së dëmshpërblimit.

Ndërsa me dëmshpërblimin e trashëgimtarëve që kanë sasi të konsiderueshme parash për t'u lëvruar ( mbi 1 milion lekë) do të vijohet njëjtë, aty ku kanë mbetur, sipas një radhe kronologjike. Këta të fundit duhet të ndjekin azhornimet e njoftimeve të publikuara në uebsajtin e Ministrisë së Financave, për të mos humbur mundësinë e tërheqjes së dëmshpërblimit në momentin që iu vjen radha. Në të kundërt, pagesa që duhet të shkojë për ta, kalon në favor të të tjerëve që janë në pritje. "Brenda një afati 3- mujor nga data e publikimit të listës, të gjithë trashëgimtarët e ish- të përndjekurve politikë, të cilët janë përfitues të dëmshpërblimit financiar, duhet të dorëzojnë në drejtorinë përgjegjëse për pagesat dhe dëmshpër- blimet dokumentet e parashikuara në aktet nënligjore. Kur një ish- i dënuar politik ose trashëgimtari i tij nuk dorëzon dokumentacionin e kërkuar brenda afatit të parashikuar më sipër, ai/ ajo njoftohet lidhur me përfundimin e afatit dhe i jepet edhe një afat shtesë deri në 30 ditë. Në rast se dokumentacioni i kërkuar nuk dorëzohet edhe brenda afatit 30- ditor, pagesa i kalon personave që nuk bëjnë pjesë në kategorinë e subjekteve përfituese parësore, të cilët në përputhje me ligjin kanë dorëzuar dokumentet e duhura dhe janë të gatshëm për pagesë", nënvizohet në udhëzimin e Ministrisë. Procesi i dëmshpërblimit të ish të përndjekurve politikë ka nisur në vitin 2008 dhe për të ka patur shpesh rezerva. Shumë prej të dënuarve kanë humbur jetën gjatë këtyre viteve pa mundur të marrin atë që iu takon, ndërsa të tjerë janë ende në proces. Aktualisht, për kategoritë parësore, procesi ka mbetur në këstin e 22të të dëmshpërblimit, ndërsa për kategoritë jo prioritare siç janë trashëgimtarët, procesi është vetëm në këstin e tretë.