Arrestohet në Morinë 27- vjeçari nga Kosova për pjesëmarrje në organizatë kriminale
Një 27- vjeçar nga Kosova është vënë në pranga në pikën e kalimit kufitar në Morinë. Ai tentoi të hynte në Kosovë, por pas kontrolleve, u konstatua se i riu ishte shpallur në kërkim ndërkombëtar nga Italia për organizatë kriminale dhe emigracion të paligjshëm. Interpol Tirana, në bashkëpunim me homologët në Itali, vijon procedurat për ekstradimin e 27- vjeçarit.
Tentoi të dilte nga Shqipëria, ndërkohë që ishte i shpallur në kërkim ndërkombëtar, nga autoritetet e Italisë, për organizatë kriminale dhe emigracion të paligjshëm, arrestohet me qëllim ekstradimin, 27vjeçari nga Kosova. Krahas angazhimit maksimal për të ofruar shërbim cilësor, të shpejtë dhe me etikë, për qytetarët në hyrje/ dalje të vendit, shërbimet e Policisë Kufitare të PKK Morinë kanë vijuar punën për goditjen e paligjshmërive në kufi, si dhe për ndalimin e shtetasve që sinjalizohen si të shpallur në kërkim dhe tentojnë të hyjnë apo të dalin nga kjo Pikë e Kalimit Kufitar.
Në këtë kuadër, në bashkëpunim me shërbimet e Drejtorisë Vendore të Policisë Kukës dhe si rezultat i shkëmbimit të informacioneve ndërmjet Interpol Tiranës dhe autoriteteve italiane, u kap dhe u vu në pranga, me qëllim ekstradimin drejt Italisë, shtetasi i kërkuar ndërkombëtarisht: L. A., 27 vjeç, banues në Istog, Kosovë. Gjatë verifikimeve dhe intervistimit në vijë të dytë, në dalje të vendit, rezultoi se 27- vjeçari ishte shpallur në kërkim ndërkombëtar nga autoritetet Italiane, pasi Gjykata e Triestes, Itali, i ka caktuar masën e sigurisë "Arrest në burg", për veprat penale "Organizatë kriminale" dhe "Emigracioni i paligjshëm", sipas parashikimeve të legjislacionit penal të Italisë. Interpol Tirana, në bashkëpunim me homologët në Itali vijon procedurat për ekstradimin e 27- vjeçarit.