Bardhi, letër Presidentit: Kthe ligjin për komisionet hetimore!
Ndryshimet ligjore ngushtojnë çdo hapësirë për hetimin real Opozita i kërkon Begajt të mos dekretojë ndryshimet për komisionet: Bie ndesh me Kushtetutën. Mundëso dialogun mes palëve!
Opozita i kërkon Presidentit të Republikës të mos dekretojë ndryshimet në ligjin për komisionet hetimore, të miratuara vetëm me votën e Partisë Socialiste.
Pak ditë përpara se Kuvendi të nisë sesionin e ri parlamentar, kreu i grupit të demokratëve, Gazment Bardhi, i kërkon Presidentit Bajram Begaj të kthejë për rishqyrtim ligjin e miratuar nga mazhoranca mes kaosit në seancën plenare të datës 21 dhjetor, atë për ngritjen e komisioneve hetimore. Në një letër të gjatë prej 7 faqesh, Bardhi argumenton se ligj bie ndesh me Kushtetutën dhe ka për qëllim ligjërimin e vendimmarrjeve antikushtetuese të deritanishme për rrëzimin e kërkesave të deputetëve të opozitës për ngritjen e komisioneve hetimore. Sipas Bardhit, përmes ndryshimeve të ligjit, mazhoranca synon të vendosë në kontroll të plotë opozitën dhe në rast të ngritjes së Komisioneve Hetimore, pamundësimin e ushtrimit të kontrollit hetimor parlamentar efektiv. Kreu i grupit parlamentar të demokratëve i kërkon kreut të shtetit si përfaqësues i unitetit të popullit të luajë rrolin e tij kushtetues për të nxitur dhe mundësuar dialogun politik mes palëve, ku përfshihet edhe diskutimi e miratimi konsensual i ndryshimeve në ligjin për komisionet hetimore. “Hyrja në fuqi e këtij ligji, që në mënyrë antikushtetuese nuk lejon kontrollin efektiv parlamentar nga ana e pakicës, do të minonte çdo mundësi dialogu mes palëve politike në Parlament, për gjetjen e një zgjidhjeje mbi situatën e krijuar. Në këtë kuptim, Presidenti i Republikës, si kreu i shtetit, duhet të luajë rolin e tij kushtetues për të nxitur dialogun politik mes palëve, ku përfshihet edhe diskutimi e miratimi konsensual i ndryshimeve në ligjin për komisionet hetimore”, - shprehet kreu i grupit parlamentar të PD- së. Sipas Bardhit, “marrja e një autorizimi nga prokuroria ose gjykata është e paprecedentë në
asnjë shtet të së drejtës apo shoqëri demokratike, edhe në kontekstin e parimit të ndarjes dhe balancimit të pushteteve. Ashtu siç është shprehur Gjykata Kushtetuese në mënyrë të përsëritur, ekzistenca e një procesi penal nuk përbën pengesë për veprimtarinë hetimore të Kuvendit, në kushtet kur qëllimet që ndjekin janë të ndryshme. Nga ana tjetër, dhënia e së drejtës dëshmitarit për të refuzuar përgjigjen në çdo rast që ai vlerëson se vetë apo persona të lidhur me të mund të ek
spozohen ndaj hetimeve, mund të përdoret si taktikë nga dëshmitarët apo mbrojtësit e tyre për të refuzuar transparencën dhe llogaridhënien në raport me komisionin hetimor”. Bardhi përmend se: “Në ligjin e miratuar nga socialistët nuk gjejnë reflektim qëndrimet e konsoliduara të Gjykatës Kushtetuese, ku theksohet se Kuvendi, në rast se kërkohet ngritja e një komisioni parlamentar nga një e katërta e deputetëve të Kuvendit, ka detyrimin që të mos ia nënshtrojë debatit parlamentar,
por vetëm të diskutojë lidhur me shkallën e respektimit të parimeve kushtetuese në objektin e veprimtarisë së tij. Dhe në rast se shumica parlamentare ngre pretendime lidhur me mosrespektimin e parimeve kushtetuese, ajo ka të drejtë t’i propozojë pakicës formulime alternative, deri në arritjen e një konsensusi. Megjithatë, këto propozime alternative nuk mund të jenë të atilla sa të reduktojnë objektin e hetimit deri në atë masë sa t’ia pamundësojë komisionit kryerjen e veprimtarisë së tij”. Ndryshimet në
ligjin për komisionet hetimore u miratuan në seancën e 21 dhjetorit pa konsensusin e opozitës, e cila e ka bërë të qartë se nuk i pranon këto ndryshime, të cilat sipas demokratëve ngushtojnë çdo hapësirë për hetimin real të një çështjeje. Prej 5 tetorit, opozita ka nisur aksionin
për bllokimin e çdo mbledhjeje të parlamentit, duke vendosur 3 kushte; e para ngritja e komisioneve hetimore, e dyta e drejta e vetos në komisionin e reformës zgjedhore dhe e fundit zyrtarizimi i Gazment Bardhit si kryetar i grupit parlamentar të PD- së.