Iran, publikoi një foto pa hixhab, dënohet me 74 goditje kamxhiku aktivistja
Roya Heshmati, 33 vjeçe, një aktiviste iraniane që kundërshton përdorimin e mbulesës së detyrueshme, u dënua me një vit burg dhe ndalim për t'u larguar nga vendi për tre vjet, raporton Hengaw, një OJQ kurde, organizatë e të drejtave të njeriut me bazë në Norvegji. Dënimi i saj u konvertua me 74 rrahje me kamxhik për përhapjen e një fotoje të saj pa hixhab ( velo), të realizuar në bulevardin Keshavarz në Teheran. "Burri që kreu ekzekutimin me kamzhik kërcënoi se do të intensifikonte rahjet dhe do të hapte një çështje të re kundër saj", shkroi Roya në faqen e saj në Facebook. Roua shpjegoi se një grua e mbuluar, me siguri punonjëse e gjykatës, i kishte vendosur me forcë një vello në kokë dhe se ajo ishte goditur me kamxhik në shpatulla e pjesë të tjera të trupit. Edhe katër ditë më parë pronarja e një dyqani në Iran u dënua me dy vjet burgim, për shkak se kishte publikuar fotografi pa shami në kokë. Sipas rrjeti amerikan për të drejtat e njeriut, HRANA, Zeinab Khenyab Pour ishte dënuar në fillim të dhjetorit me tre muaj burgim, në një rast tjetër për "propagandë kundër shtetit". Zeinab, e cila vjen nga jugperëndimi i Iranit, kishte tërhequr vëmendje të madhe gjatë protestave gjithëkombëtare, kur autoritetet ia kishin mbyllur dyqanin. Në shtator 2022, vdekja e gruas së re kurde, Mahsa Amini, nxiti protestat më të mëdha në historinë e Republikës Islamike. Për disa muaj rresht, të rinjtë dolën nëpër rrugë për të demonstruar kundër sundimit islamik. Amini vdiq në paraburgimin e policisë së moralit të Iranit, ku po mbahej pasi ishte arrestuar se gjoja nuk e kishte veshur siç duhet shaminë e kokës, apo hixhabin. Protestat e humbën gjallërinë dalëngadalë kah fundi i vitit 2022, pasi protestuesit u përballën me hakmarrje të fortë shtypëse nga forcat e sigurisë. Qindra protestues u vranë dhe mijëra u arrestuan, sipas aktivistëve dhe Kombeve të Bashkuara.