Beqaj: Hetimet janë të ngushta, të shtrihen nga 2011 deri në 2013
Ish- ministri Ilir Beqaj për më shumë se 8 orë pyetet sërish në SPAK Ish- kreu i Shëndetësisë tha se u mor në pyetje nga prokurorët për dosjen e “Sterilizimit”, bazuar në materialet e KLSH- së
Ilir Beqja shkon sërish në Prokurorinë e Posaçme, por kësaj radhe për t’u marrë në pyetje.
Në dalje, ai ka folur me gjuhën e punës së prokurorëve, ndërkohë që vetëm pak ditë më parë, SPAK e BKH mësynë jo vetëm banesën e tij, por edhe një sërë farmacish dhe të një kompanie farmaceutike. Në dalje ai ka thënë se ka marrë premtimin se do të rimarrë sendet e tij personale, ku bëhet fjalë për kompjuterin, po ashtu ai ka treguar edhe rrugën që duhet të ndjekë Prokuroria për të shkuar tek e vërteta. Beqja është nën akuzë për shpërdorim detyre, abuzim dhe falsifikim të formularëve, ndërkohë që ish zëvendësi i tij dhe biznesmeni që përfitoi tenderin janë në burg dhe madje nën masën e sigurimit personal arrest me burg. MARRJA NË PYETJE Prej orës 09: 00 të mëngjesit të djeshëm, ishministri i Shëndetësisë, Ilir Beqaj, ka qenë në
SPAK ku është thirrur nga prokurorët Edvin Kondili dhe Eneid Nakuçi si person nën hetim lidhur me koncesionin e sterilizimit. Ai ka dalë pas rreth nëntë orësh nga Prokuroria dhe në një prononcim për mediat, tha se mori konfirmim nga prokurorët se do t’i kthehen sendet e sekuestruara në kuadër të hetimit që po bëhet për këtë çështje. Beqaj ka theksuar se seancat e marrjes në pyetje do të vijojnë me marrjen e raportit të plotë të Kontrollit të Lartë të Shtetit, ndërsa nënvizoi më tej se hetimet është e nevojshme që të shtrihen nga marsi i vitit 2011 deri në shtator të vitit 2013. Beqaj theksoi se do të hetohet pse dy vjet e gjysmë u mbajt në qese ai central dhe nuk u vu në punë. “Besoj se hetimet j anë ende shumë të ngushta. Është e domosdoshme që të shtrihen në dy pjesë, së pari nga marsi i vitit 2011 deri në shtator të vitit 2013 për të hetuar tani pse dy vjet e gjysmë u mbajt në qese ai central dhe pse nuk u vu në punë”, - tha ai mes të tjerash.
Ish- ministri u përgjigj edhe për përgjimet e publikuara në media lidhur me dosjen e dytë të hapur ndaj tij nga SPAK për abuzime edhe me fondet e Agjencisë Shtetërore të Programimit Strategjik dhe Koordinimit të Ndihmës, SASPAC. “E rëndësishme është se u sqarua edhe fakti që Gazi dhe aneksi tetë kanë lidhje me sterilizimin dhe s’kanë lidhje me çështjen tjetër”, - nënvizoi ai. Beqaj ka qenë i shoqëruar nga avokati i tij, si gjithnjë, Ermal Yzeiraj. Kjo është hera e tretë e paraqitjes së tij në Prokurorinë e Posaçme për çështjen e sterilizimit. Pak ditë më parë Beqaj bëri thirrje t’i dorëzonin kompjuterin e sekuestruar pasi aty sipas tij ka materialet e sterilizimit, si dhe t’i vinin në dispozicion auditet që ka bërë Kontrolli i Lartë i Shtetit në të cilët Prokuroria është bazuar për të ngritur akuzën ndaj tij dhe personave të tjerë, si ishzv. ministri i Shëndetësisë, Klodian Rrjepaj dhe biznesmeni që ka fituar koncesionin, Ilir Rrapaj. Beqaj u akuzua fillimisht për shpërdorim detyre e pas sugjerimit të GJKKO, iu shtua edhe akuza për falsifikim të vulave e stampave zyrtare. Ish- ministri gjithashtu është person nën hetim edhe për çështjen e “chekap”- it dhe disa ditë më parë iu kontrollua banesa pasi ka dyshime se ka abuzuar edhe me fondet e SASPAC.