Kuvendi njofton KQZ- në për mbarimin e mandatit të Arben Ahmetajt

Kuvendi me anë të një shkrese zyrtare njoftoi dje Komisionin Qendror të Zgjedhjeve për përfundimin e mandatit të ishzv. kryeministrit, Arben Ahmetaj. Socialisti Ahmetaj prej rreth 6 muajsh është në arrati dhe ndaj tij po zhvillohen një sërë hetimesh që lidhen me aferën e incineratorëve. Në letrën e firmosur nga sekretari i Përgjithshëm i Kuvendit, Genci Gjoncaj theksohet se, “ju njofton mbarimin përpara afatit kushtetues të mandatit të deputetit të PS- së, Arben Ahmetaj, për shkak të mungesës së tij pa arsye për mbi 6 muaj rresht në Kuvend. Kjo për arsye se seanca e fundit plenare ku deputeti Arben Ahmetaj ka marrë pjesë është data 6 korrik 2023”. Tashmë KQZ pritet të kalojë mandatin e Ahmetajt, një prej pasuesve në listën e socialistëve të Qarkut të Tiranës. Në pritje për këtë post është Dallëndyshe Bici, drejtoresha aktuale e Kadastrës, por në qarqet e politikës është diskutuar se kjo e fundit nuk do ta pranojë mandatin. Nëse Bici refuzon, pasues në listë është Plarent Nderca, ish- sekretar i përgjithshëm i Ministrisë së Brendshme. Mbi Arben Ahmetajn rëndojnë akuzat për korrupsion, pastrim parash dhe fshehje pasurie, në lidhje me skandalin e incineratorëve. Në kërkim ndërkombëtar pasi akuzohet nga SPAK për korrupsion dhe fshehje të produkteve të veprës penale, Arben Ahmetaj zhvishet edhe nga detyra e fundit e deputetit të Partisë Socialiste. Mandati i tij quhet i përfunduar, pasi për 6 muaj rresht ish numri dy i qeverisë mungoi pa arsye në kuvend. Ky parashikim në kushtetutë i jep të drejtë kryeparlamentares Lindita Nikolla, që në nisje të parlamentit të bëjë me dije përfundimin e mandatit dhe të vë në dijeni Komisionin Qendror të Zgjedhjeve për zëvendësimin e Arben Ahmetaj. Sipas rezultateve të dala nga vota e parlamentareve të 2021- it, mandatin e deputetit e merr Dallëndryshe Bici. Mbetet për t’u parë nëse ajo do të lërë detyrën e drejtueses së Kadastrës pas 11 muajsh në krye të një prej institucioneve më të rëndësishme të dokumenteve të pronësisë. Jo zyrtarisht emri më i përfolur për t’u ulur në karrigen e deputetit është juristi dhe anëtari i Këshillit Bashkiak Tiranë, Plarent Ndreca. Për nga sasia e votave të marra ai renditet pas Dallëndyshe Bicit. Grupi parlamentar i socialistëve nuk do të jetë i vetmi që do të rikthehet në Kuvend me ndryshime. Pjesës më të madhe të opozitës pritet t’i mungojë lideri i saj, Sali Berisha, për shkak të arrestit në shtëpi. Ndryshimet apo mungesat te shumica socialiste dhe opozita janë kokëçarja më e vogël për qeverinë përballë vendosmërisë së demokratëve për të trazuar jetën parlamentare. Tymueset, barrikadat me karrige apo çdo formë tjetër që pamundëson normalitetin në kuvend mbeten deri më tani skenarë të pandryshuar për opozitën që nga ana tjetër shumica socialiste e kërcënon me përjashtime që shkojnë deri në 60 ditë pa punë e rrogë.