Mediu: S’kam pasur njohje me kompaninë shqiptare dhe as amerikane
Ish- drejtuesi i kompanisë MEICO ka dëshmuar në seancën e djeshme, duke bërë përgjegjës për shpërthimin Forcat e Armatosura
Ish- ministri i Mbrojtjes, Fatmir Mediu, pas gjyqit për çështjen “Gërdeci” është shprehur se nuk e ka shkelur asnjëherë autoritetin e Forcave të Armatosura.
Mediu theksoi se ish- drejtor i kompanisë MEICO, Ylli Pinari, ishte një nga dëshmitarët më të rëndësishëm të Gërdecit, ndërsa shton se është e qartë “që nuk ka të bëjë me implikimin e ministrit apo të interesave të ministrit”. Ai deklaroi se gjatë kohës që mbante postin e ministrit nuk ka pasur njohje as me kompaninë shqiptare dhe as atë amerikane. “Pinari ka qenë një nga dëshmitarët më të rëndësishëm të Gërdecit, e kërkova këtë në emër të së vërtetës dhe drejtësisë. Kam qenë i kursyer, është hedhur shumë baltë dhe janë bërë shumë aludime, por sot qartësisht duket që nuk ka të bëjë me implikimin e ministrit apo të interesave të ministrit. Ministri nuk ka pasur njohje as me kompaninë shqiptare, as amerikane, nuk ka pasur asnjë kontakt me ta, nuk ka shkelur autoritetin e FA për t’u shmangur nga procesi”, - tha në media pas dal
jes nga GJKKO. DËSHMIA
Fatmir Mediu u shpreh se si ministër i Mbrojtjes nuk i ka shkuar asnjë akt shqetësues në lidhje me procesin e demontimit dhe transportimit të armëve. “Ka një sistem komandimi kontrolli në FA, që do të thotë kur komandohet ose jepet një urdhër, ato adresohen dhe zbatohen në strukturat përkatëse, këta të fundit bëjnë aktet e kontrollit. I vetmi akt shqetësues që mua më ka ardhur si ministër i
Mbrojtjes ka qenë një raport i Policisë Ushtarake, ku përmendej se në Gërdec po prisheshin godinat pa leje. Ministri i Mbrojtjes e ka adresuar çështjet tek autoritetet ushtarake dhe civile, duke kërkuar që të bëhet një urdhër për procedim penal dhe administrativ të shkelësve. Nuk ka asnjë informacion tjetër që të ketë ardhur as nga MEICO, as nga FA dhe as nga strukturat civile të inspektimit”, - shtoi ai. Ish- ministri Mediu gjithashtu u shpreh se duhet deklasifikuar raporti i Këshillit të Sigurisë Kombëtare për çështjen “Gërdeci”. “Zhvillimet në rajon tregojnë se ka pasur interferencë për të penguar anëtarësimin e vendeve të Ballkanit në NATO. Të dhënat janë edhe me emra në mbledhjen e Këshillit të Sigurisë Kombëtare, që nuk po i deklasifikoj sot, megjithëse duhet të ishin deklasifikuar me kohë. Kam menduar se shteti duhet të bënte një analizë të vetën. Di që është kërkuar nga të gjithë ata që janë dënuar, të bëhet një eksperiment për gjetjen e shkakut pse ndodhi tragjedia. Raporti i Këshillit të sigurisë Kombëtare, raportet e shërbimeve që kanë mbajtur, dokumentet nga ministrisë, nuk besoj se ka më ndonjë gjë sekrete. Shpresoj se kur të vijnë për të deponuar autoritetet e inteligjencës këtu, të japin deponimin në raport me atë që ka ndodhur. Unë i kam kërkuar Presidentit të Republikës me shkrim që të më japë informacion në lidhje me mbledhjen e Këshillit të Sigurisë Kombëtare, unë e kam informacion, por e doja si dokument zyrtar për ta bërë pjesë të dosjes. Ky dokument duhet të ishte shqyrtuar nga Prokuroria e Përgjithshme, që ngriti çështjen”, - theksoi Mediu.
YLLI PINARI: PËRGJEGJËSE JANË FORCAT E ARMATOSURA
Ish- drejtor i kompanisë MEICO, Ylli Pinari, pas dëshmisë në GJKKO në një prononcim për mediat në ambientet e jashtme të gjykatës, ka deklaruar se përgjegjës për ngjarjen e rëndë të Gërdecit janë Forcat e Armatosura dhe kompania kontraktore. Sipas Pinarit, FA- të dhe kompania nuk zbatuar rregullat që i ishin përcaktuar në kontratë. Shpërthimi është përgjegjësi e Forcave të Armatosura. Ato nuk kanë kryer asnjë nga detyrat që u përcakton legjislacioni, vendimet e qeverisë dhe urdhrat e ministrit. Për mua është përgjegjësi e tyre, e operatorit që duhet të zbatonte rregullat që ne i kishim caktuar në kontratë”, - deklaroi ai. Më tej, ai shtoi se MEICO kishte për detyrë të merrte në dorëzim dhe të dorëzonte municionin. “MEICO kishte detyrën të merrte në dorëzim dhe të dorëzonte municionin, kaq. Vetë statusi i MEICO është ndërmarrje që përfaqëson interesat e pronarit të mallit, që ishin Forcat e Armatosura, dorëzonte mallin dhe të gjitha arkëtimet e lekëve kalonin në buxhetin e shtetit”, - deklaroi jashtë GJKKO, Ylli Pinari.