Opozita çoi në Kushtetuese marrëveshjen për emigrantët, shqyrtimi më 18 janar
Më datën 18 janar në orën 10: 00 do të zhvillohet seanca në Kushtetuese për marrëveshjen Shqipëri- Itali për emigrantët. Grupi Parlamentar i PD- së ka kërkuar deklarimin e papajtueshëm me Kushtetutën të Protokollit të qeverisë shqiptare me qeverinë italiane, bazuar në 10 argumente me një shkresë të firmosur nga 30 deputetë mw 6 dhjetor. Grupi parlamentar demokrat i kërkoi dje Gjykatës Kushtetuese, që seancën për marrëveshjen e emigrantëve me Italinë, ta shqyrtoje në seancë të hapur për publikun. Në shkresën drejtuar këtij institucioni dhe që mban firmën e kryetarit të grupit, Gazment Bardhi, argumentohet fakti se seanca duhet të jetë të jetë e hapur mediat dhe publikun, pasi mbart një rendësi te veçantë. "Për më tepër, në përmbajtje të kërkesës, kërkuesit kanë arsyetuar gjerësisht se Këshilli i Ministrave veproi në mungesë konsultimi dhe transparence në fazën e negocimit dhe nënshkrimit të kësaj marrëveshjeje qoftë me aktorët institucionalë vendas dhe ndërkombëtarë ( Presidenti i Republikës, Kuvendi i Shqipërisë, Zyra e Komisionerit të Lartë të OKB- së për Refugjatët, Komisionerja e Këshillit të Evropës për të Drejtat e Njeriut), ashtu edhe me median, shoqërinë civile dhe qytetarët. Në këto kushte, shqyrtimi i çështjes nga Gjykata Kushtetuese është një mundësi për të bërë transparencë të plotë mbi procedurën e ndjekur dhe përmbajtjen e këtij Protokolli. Kjo transparencë mund të realizohej vetëm në kushtet kur shqyrtimi i çështjes do të bëhej në seancë plenare publike. Pra, transparenca e munguar nga Këshilli i Ministrave gjatë negocimit dhe nënshkrimit të këtij Protokolli, duket se vazhdon edhe gjatë shqyrtimit të kësaj çështjeje nga Gjykata Kushtetuese, për sa kohë që publiku dhe mediat nuk kanë mundësi që të njihen me materialet e çështjes dhe të dëgjojnë qëndrimet e palëve, pyetjet e Gjykatës dhe përgjigjet e tyre, si dhe debatin gjyqësor. Po ashtu, sjellim në vëmendje se të gjitha kërkesat e paraqitura nga subjekti kushtetues jo më pak se një e pesta e deputetëve gjatë kësaj legjislature janë shqyrtuar në seanca plenare publike pikërisht nga interes i veçantë publik që mbartin", - thuhet në shkresë. Gjykata Kushtetuese pezulloi ratifikimin në Kuvend për marrëveshjen Shqipëri- Itali për emigrantët duke marrë në shqyrtim çështjen.