Rama po godet “Zgjedhoren”, Bylykbashi: Konsensusi për reformën, i domosdoshëm

Opozita akuzon kryeministrin Edi Rama se kërkon të deformojë rezultatin e zgjedhjeve të ardhshme parlamentare, duke ndryshuar në mënyrë të njëanshme rregullat e lojës. Nënkryetari i PD- së së drejtuar nga Sali Berisha, Oerd Bylykbashi, i cili prej 2 dekadash ka qenë pjesë e çdo reforme zgjedhore, sjell në vëmendje se realizimi i kësaj reforme me konsensus në një komision bipartizan u vendos për herë të parë në vitin 2002. “Asokohe – shpjegon Bylykbashi – OSBE- ODIHR e Këshilli i Europës pas zgjedhjeve problematike të vitit 2001 i kërkuan Fatos Nanos dhe Sali Berishës të nënshkruanin një marrëveshje për realizimin me konsensus të reformës elektorale, ku socialistët u angazhuan të mos përdornin shumicën e kartonëve në Kuvend kundër vendimeve të komisionit bipartizan. Termi bipartizan përtej aspektit qesharak të frazeologjisë së Edi Ramës, nuk ka të bëjë me partizanë dhe ballistët e Edi Ramës, ka të bëjë më faktin që politika ka dy palë, jo dy parti. Ky komision duhet të jetë me 50% mazhoranca, 50% opozita, pra përfaqësim i barabartë dhe me të drejtën për të ushtruar veto ose për të dhënë konsensusin e dy partive më të mëdha të mazhorancës dhe opozitës”, - tha Bylykbashi për “Vizion Plus”. Ai shpjegon se në dy dekada konsensusi ka bërë që partitë politike të pranojnë rezultatin e zgjedhjeve. “Ajo që ka mundësuar konsensualiteti i reformës zgjedhore në këtë periudhë janë dy rotacione demokratike me zgjedhje, në vitin 2005 dhe 2013, sepse rregullat e përbashkëta me konsensus u kanë dhënë mundësi palëve që sado problem të kishte në zgjedhje, të prevalonte vota”, - u shpreh ai. Nënkryetari i demokratëve kujton transformimin e Edi Ramës duke sjellë në vëmendje se në vitin 2009, edhe vendimet e qeverisë që kishin lidhje me zgjedhjet duhet të ishin konsensuale. “Ajo që bie në sy është kontrasti i fortë mes Edi Ramës, që në pushtet dhunon çdo hapësirë bashkëpunimi, konsensualiteti, darkordësie për rregullat e lojës, jo për rezultatin e lojës; me Edi Ramën që qarravitej në kancelaritë e Europës duke kërkuar reformë zgjedhore konsensuale”, - tha Bylykbashi. Sipas tij, qëllimi i retorikes së re të Edi Ramës është i qartë. “Qartazi Edi Rama kërkon të konsolidojë kapjen e zgjedhjeve tashmë jo vetëm nëpërmjet sistemit të patronazhimit, por duke ndryshuar në mënyrë të njëanshme edhe kornizën ligjore, përveç sistemit zgjedhor”, - deklaroi ai. Bylykbashi ka zbuluar se edhe faktori ndërkombëtar është i interesuar për një reformë konsensuale. “Edhe faktori ndërkombëtar po i bën presion Edi Ramës dhe i kërkon që të ketë një reformë gjithëpërfshirëse që do të thotë konsensuale”, - tha deputeti demokrat. Komisioni i Reformës Zgjedhore dhe ndryshimi i rregullave për zgjedhjet me konsensus është një prej arsyeve pse opozita po bllokon parlamentin prej 5 tetorit të vitit të kaluar e nëse kërkesat e saj nuk plotësohen, tensioni në parlament mund të përshkallëzohet.