Mbrojtja, vijnë helikopterët e parë “Black Hawk”
Ditën e shtunë, Shqipërisë i mbërritën helikopterët e parë UH- 60 “Black Hawk”. Në një reagim në rrjetet sociale, Ambasada e SHBA- ve në Tiranë shprehet se helikopterët do të ndihmojnë në forcimin e aftësive të forcave ajrore të Shqipërisë. Po ashtu, theksojnë se do të mbështesin lëvizjet logjistike të NATO- s për operacione dhe stërvitje. “Mbërritje historike e helikopterëve të parë ‘ UH- 60 Black Hawk’ të Shqipërisë. Një avion transportues C- 17 i Shteteve të Bashkuara erdhi në Tiranë për të dorëzuar porosinë e parë të Shqipërisë për helikopterë ‘ Black Hawk’, mbështetur me mbi 50 milionë dollarë nga fondet e ndihmës së SHBA- ve. Helikopterët e rinj do të ndihmojnë në forcimin e aftësive të forcave ajrore të Shqipërisë dhe aftësinë për të kryer evakuim mjekësor, rikuperim të personelit, misione kërkim- shpëtimi, si dhe mbështetje të lëvizjeve logjistike të NATO- s për operacione dhe stërvitje. Shtetet e Bashkuara janë krenare për partneritetin e fortë me Shqipërinë në fushën e mbrojtjes”, - thuhet në reagimin e ambasadës amerikane në Tiranë. Kurse dje u krijua njësia Ushtarake e Sigurisë Kibernetike, me një rol kyç në luftën kundër kërcënimeve kibernetike dhe mbrojtjes së sistemeve tona të informacionit. Kjo njësi do të ketë mbështetjen e Shteteve të Bashkuara të Amerikës dhe do të funksionojë falë ekspertizës së specializuar të profesionistëve dhe teknologjisë së përparuar. Kryeministri Edi Rama ishte në Ministrinë e Mbrojtjes në inaugurimin e njësisë së re, si dhe për të ndjekur nga afër mënyrën e funksionimit të saj.