Kriza, Begaj: Kuvendi ka nevojë për opozitën
“Për shkak të tensioneve, doja të komunikoja me deputetët” Kreu i shtetit: Në Kuvend ballafaqohen ide, jo luftë! Rikthejuni bashkëpunimit parlamentar dhe rigjeni qëllimin e humbur
Presidenti i vendit, Bajram Begaj, apeloi dje për normalitet në Kuvend. Fjalimin që duhej ta mbante në Parlament, Begaj e dha nga institucioni i Presidencës, pasi deputetët demokratë bllokuan foltoren.
Begaj iu drejtua deputetëve që të riorientojnë dialogun për të mirën e përbashkët, të rikthejnë bashkëpunimin parlamentar dhe të rigjejnë qëllimin e humbur. Që në nisje, kreu i shtetit theksoi se dje kishte zgjedhur t’u drejtohej drejtpërdrejtë të dyja palëve politike, për shkak të tensioneve përgjatë sesionit të shkuar parlamentar. “Isha përgatitur që sot ( dje) t’i drejtohesha Kuvendit në sallën e seancës plenare me rastin e fillimit të sesionit të ri parlamentar. Nuk është hera e parë që Presidenti i drejtohet Kuvendit me mesazh, për çdo çelje sezoni gjeni mesazhin e Presidentit. Sot ( dje) zgjodha të komunikoj drejtpërdrejtë me deputetët për shkak të rrethanave që shoqëruan mbylljen e sesionit të kaluar. Pamundësia për zhvillimin e një seance normale më bën që këtë mesazh ta përcjell për politikanë dhe deputetët e Shqipërisë përmes jush. Çelja e punimeve të sesionit të ri të Kuvendit ishte një mundësi e mirë që deputetët e Kuvendit të shënonin fillimin e një kthese në jetën politike të vendit tonë”, - deklaroi kreu i shtetit. Begaj u shpreh se Kuvendi është skena e ballafaqimit të ideve dhe jo arena e luftës ndaj kundërshtarit. “Jam i bindur se deputetët dhe klasa politike mund të gjejë forca që konfliktin politik ta zëvendësojnë me bashkëpunim konstruktiv, përçarjen ta këmbejnë me frymën e shenjtë të parlamentarizmit demokratik dhe shtetit të së drejtës pa shuar debatin që institucionet e shtetit të forcohen. Në demokraci përballja e ideve brenda kornizës së respektit për tjetrin dhe vetëpërmbajtja janë domosdoshmëri. Prandaj debati lipset konstruktiv. Kuvendi është skena e ballafaqimit të ideve, jo arena e luftës ndaj kundërshtarit. Është dora e shtrirë ndaj kompromisit dhe
dialogut. Sesioni i kaluar i Kuvendit fatkeqësisht shpenzoi më shumë kohë për axhenda joparlamentare se sa për çështje madhore për vendin. Koha e humbur në theksimin e ndasive nuk kthehet më. Ky sesion i ri parlamentar është një mundësi e re për ju deputetë që të riorientoni dialogun për të mirën e përbashkët, interesin kombëtar dhe konsolidimin e pozitave të Shqipërisë në ra
jon, me BE- në dhe aleatët tanë strategjikë, SHBA- të. Ndaj uroj t’i riktheheni bashkëpunimit parlamentar dhe të rigjeni qëllimin e humbur. Të gjithë ne shqiptarët i kemi sytë nga ju. Përveç rolit të ligjbërësve, keni rolin e rëndësishëm të modeleve në shoqëri”, - deklaroi Presidenti. Ndër të tjera, Begaj tha se Kuvendi ka nevojë për opozitën dhe zërin e saj në përballjen me ide dhe
argumente. Sipas tij, interesat partiake nuk mund të bëhen pengesë për zhvillimin e vendit. “Kuvendi është hapësira e debateve, ku profesionistë të ndryshëm, media, studentë, shoqëria civile, diaspora dhe përfaqësuesit e shtresave të ndryshme sociale e të pakicave kombëtare të kenë mundësi të përfshihen e të dëgjohen. Kuvendi ka nevojë për opozitën, ka nevojë për
zërin e saj, argumentet e saj, si dhe përballjen në debate me ide dhe argumente. Bashkëpunimi vullnetmirë midis forcave politike ka fuqinë të japë zgjidhje dhe të çliroje energji pozitive. Në Kuvend duhet kultivuar demokracia, frymëzimi për të tashmen dhe shpresa për të ardhmen. Demokracia është një proces që jetësohet nga përkushtimi për konsolidimin e saj. Pa diskutimin e vazhdueshëm midis ofertave politike dhe dakordësinë e palëve që ato t’i shërbejnë të mirës së qytetarëve dhe prosperitetit të vendit, demokracia është e cenuar. Nuk mund të ketë liri, përparim apo drejtësi sociale pa demokracinë në themel të ndërveprimit tonë. Klasa politike ka detyrën që të jetë në vijën e parë të mbrojtjes së parimeve demokratike. Interesat partiake nuk mund të bëhen pengesë për konsolidimin e shtetit të së drejtës, zhvillimit social- ekonomik të vendit dhe për situatën ku ndodhemi, për ecurinë e procesit integrues në BE”, - u shpreh kreu i shtetit. Duke folur për sfidat e reja të këtij sesioni, Begaj u tha se ato kërkojnë përkushtim, atdhedashuri dhe kthjelltësi nga të gjithë. “Jam i vetëdijshëm se axhenda politike e këtij sesioni kuvendor është e mbushur me sfida. Siguria, drejtësia, arsimi, shëndetësia, rritja e mirëqenies në të gjitha shtresat e popullsisë, demografia, mjedisi, drejtësia sociale janë sfida që kërkojnë përkushtim, atdhedashuri dhe kthjelltësi. Koha nuk pret”, - theksoi Presidenti i Republikës. Z. Begaj nuk mundi ta mbante fjalën në sallë të Kuvendit, pasi nuk u lejua nga opozita. Kjo e fundit e cilësoi praninë e tij në sallë si provokim. Gazment Bardhi tha se Presidenti është në dijeni që jeta parlamentare nuk funksionon prej muajsh, ndaj praninë e tij e cilësoi si akt të rëndë. Ndërsa Flamur Noka u shpreh se me praninë e tij, Presidenti thelloi krizën mes mazhorancës dhe opozitës.