Gjiknuri e Alibeaj, shkresë OSBE/ ODIHR- it: Duam ekspertët tuaj për Reformën Zgjedhore
Dy bashkëkryetarët e Komisionit të Reformës Zgjedhore, Damian Gjinkuri i mazhorancës dhe Enkeled Alibeaj i opozitës, i drejtuan dje një letër të përbashkët zyrtare drejtorit të OSBE/ ODIHR- it, Matteo Meçaçi. Në shkresë, ata kërkojnë që ekspertë të fushës së zgjedhjeve të ODIHR- it të asistojnë në punën e këtij komisioni të rëndësishëm në vend. Ky i fundit i ka nisur punimet që prej shkurtit të vitit 2022 dhe ka si detyrë hartimin e ndryshimeve legjislative për Reformën Zgjedhore e në veçanti trajtimin e rekomandimeve të raporteve të OSBE/ ODIHRit për zgjedhjet e 25 prillit 2021 apo zgjedhje të tjera të patrajtuara. “Na lejoni fillimisht të shprehim falënderimet dhe mirënjohjen e thellë për kontributin që OSBE/ ODIHR ka dhënë gjatë këtyre viteve për zhvillimin dhe konsolidimin e demokracisë në Shqipëri dhe në mënyrë të veçantë në një prej themeleve të rëndësishme të saj, siç janë zgjedhjet. Me vendimin nr. 12, datë 10.02.2022, të ndryshuar, Kuvendi i Shqipërisë ka miratuar ngritjen e Komisionit të Posaçëm Parlamentar për realizimin e Reformës Zgjedhore. Komisioni ka për detyrë hartimin e ndryshimeve legjislative për reformën zgjedhore, në veçanti trajtimin e rekomandimeve të raporteve të OSBE/ ODIHRit për zgjedhjet e 25 prillit 2021 dhe për zgjedhjet e mëparshme të patrajtuara, rekomandimeve të institucioneve përgjegjëse për zgjedhjet, të partive politike parlamentare dhe organizatave jofitimprurëse. Për këtë arsye, ashtu siç ramë dakord me përfaqësues të OSBE/ ODIHR- it në takimin e zhvilluar në dhjetor 2023, ku diskutuam punën e komisionit dhe nevojën që pranë komisionit të vendoset në dispozicion ekspertiza e ODIHR- it, kemi kënaqësinë që në emër të Komisionit të Posaçëm Parlamentar për Realizimin e Reformës Zgjedhore t’ju paraqesim kërkesën për të kontribuuar me ekspertë të fushës së zgjedhjeve, të ODIHR- it, për të asistuar punën e këtij komisioni. Mënyra e komunikimit të ekspertëve të caktuar nga ju, me Komisionin e Reformës Zgjedhore, mund të përcaktohet në vijim të bashkëpunimit tonë të mëtejshëm”, - thuhet në letrën e socialistit Gjiknuri dhe demokratit Alibeaj.