Kompensimi i energjisë elektrike dhe indeksimi, sa përfitojnë pensionistët
Përveç indeksimit me 8.6 për qind në muaj, pensionistët do të vijojnë të marrin deri në 1650 lekë në muaj kompensim për dritat
Përpos indeksimit vjetor, që është në masën 8.6 për qind, pensionistët, si një ndër kategoritë e margjinalizuara të shoqërisë kanë edhe përfitime ekstra ose lehtësi që vijnë në formë përjashtimesh nga taksa e tarifa ose jepen në formë kompensimi.
I tillë është kompensimi në masën e 500 lekëve në muaj për energjinë elektrike si dhe ndryshimin e çmimit të bukës. Nga kjo skemë nuk përfitojnë vetëm pensionistët kryefamiljarë dhe ata që jetojnë të vetëm, por edhe pensionistët që kanë fëmijë të papunë ( për këtë kategori aplikohet edhe një shtesë tjetër, që është rreth 414 lekë në muaj). Pra, gjithsej janë 914 lekë, që të moshuarit do të vazhdojnë të përfitojnë çdo muaj krahas të ardhurave nga pensioni, pa përfshirë këtu edhe 648 lekë që llogariten pas heqjes së fashës për konsum deri në 300 kilovatë.
KOMPENSIMI I DRITAVE
"Edhe pas aplikimit të indeksimit, pensionisti, krahas të ardhurave nga pensioni, do të vazhdojë të marrë të ardhura të tjera që jepen me vendime të veçanta të Këshillit të Ministrave si 150 lekë në muaj kompensim për diferencën e çmimit të bukës, 350 lekë në muaj si kompensim për energjinë elektrike dhe 414 lekë në muaj për çdo pjesëtar të familjes që është në varësi ekonomike të pensionistit e të tjera", thuhet në vendimin e qeverisë. Krahas këtij kompensimi, ata të cilët trajtohen me pension minimal marrin edhe disa përfitime shtesë të miratuara ndër vite, vlera e të cilave në total shkon 1650 lekë në muaj. Kjo do të reflektohet edhe në masën e pensioneve, të cilët pas indeksimit kanë njohur një rritje e cila varion deri në 1500 lekë në muaj. Kështu, krahasuar me një vit më parë, pensio
ni minimal në qytet ka shkuar në rreth 20 000 lekë. Masa e përfitimit përllogaritet mbi bazën e kontributeve që ka gjithsecili. Mbi këtë logjikë, sa më shumë vite sigurime, aq më i lartë edhe pensioni. Por cilat janë kushtet që duhet të përmbushen për të përfituar nga skema e kompensimit? Instituti i Sigurimeve Shoqërore ka sqaruar se për të marrë rimbursimin në vlerën e 648 lekëve, duhet që pensionisti të jetë kryefamiljar, të jetë i vetëm ose pjesëtarët e tjerë të familjes të jenë pensionistë ( bashkëshorti/ tja) ose të jenë të papunë punëkërkues. Për këtë duhet të dorëzojë certifikatën familjare ku janë të shënuar pjesëtarët e familjes. Në rastin kur janë dy pensionistë, pra, burrë e grua, kompensimin e përfiton vetëm njëri prej tyre. Kjo pasi dokumenti tjetër që duhet është libreza e dritave në emër të aplikuesit për të marrë kompensimin. Por edhe nëse përfituesi plotëson kriteret, kompensimi
nuk përfitohet nëse nuk ka konsum të energjisë elektrike dhe paguhet vetëm tarifa fikse e shërbimit. Lidhur me procedurën e aplikimit, për të përfituar shtesën pensionistët duhet të paraqiten pranë drejtorive rajonale të Institutit të Sigurimeve Shoqërore, ku përveç formularit duhet të dorëzojnë një fotokopje të kartës së identitetit, kopje e kontratës me Operatorin e Shpërndarjes së Energjisë në emrin e vet, kopje e librezës ose faturës së likuiduar që vërteton që e paguajnë energjinë e konsumuar si edhe certifikatë familjare për të vërtetuar që janë kryefamiljarë të vetëm ose kanë persona të tjerë të familjes në moshë pune. Për aplikimet afati nuk është i limituar çka do të thotë se pensionistët mund të paraqiten në çdo kohë për të dorëzuar dosjen me dokumentet që kërkohen. Janë rreth 15 milionë dollarë që vendosen në dispozicion çdo vit për të përballuar efektet e kësaj skeme.