"Nuk kemi ndërmjetësuar për ' zgjedhoren'", ambasadorët rrëzojnë deklaratën e Bashës
Marrëveshja me PS për Reformën Zgjedhore, Basha tha se e arriti falë ndihmës së ambasadave. SHBA, BE dhe Anglia e mohojnë
Dy ditë më parë, Lulzim Basha njoftoi publikisht se "Në bashkëpunim me faktorin ndërkombëtar, ia kemi dalë të arrijmë një hap të parë modest sa i takon prioritetit kryesor, Reformës Zgjedhore".
Por, kjo deklaratë e bërë nga Lulzim Basha pas seancës plenare të së hënës trazoi jo pak faktorin ndërkombëtar në Tiranë. Tre ambasadat më të rëndësishme në vend, që përfaqësojnë aleatët strategjikë të Shqipërisë, kanë mohuar të kenë ndërmjetësimin për nisjen nga puna të Reformës Zgjedhore. Ambasada Britanike zgjodhi të sqarojë pozicionin e saj përmes një deklarate për shtyp. "Ndërsa nuk kemi ndërmjetësuar ndonjë marrëveshje politike, ne vazhdojmë të nxisim dialogun reciprokisht respektues dhe kontruktiv në mirëbesim mes atyre që dëshirojnë ta përfaqësojnë popullin shqiptar. Kjo është në interesin kombëtar dhe gjithashtu vendimtare për besimin e partnerëve ndërkombëtarë dhe investimeve të huaja, për të ndërtuar një të ardhme më të mirë për të gjithë shqiptarët", thuhet në reagimin e ambasadës britanike. Thirrje për gjithpërfshirje të palëve në procesin e Reformës Zgjedhore bërë edhe Ambasada e Shteteve të Bashkuara të Amerikës. Ndërkohë që "News24" pyeti dje Ambasadën e SHBA- së dhe atë të BEsë se për çfarë ndihme fliste Lulzim Basha. Zyrtarisht, këto Ambasada hodhën poshtë përfshirjen në këtë proces, por kanë bërë thirrje që kjo reformë të realizohet me konsensus. "Si pjesë e angazhimit tonë normal diplomatik me anëtarë të parlamentit, Ambasada e SHBAve takohet rregullisht me kryetarë, bashkëkryetarë dhe anëtarë të komisioneve të ndryshme parlamentare, përfshirë Komisionin për Reformën Zgjedhore. Takimet nuk janë pjesë e ndonjë ndërmjetësimi. Interesi ynë mbetet për qeverisje të efektshme dhe përfaqësuese për të zbatuar rekomandimet e ODIHR- it dhe mirëpresim idetë e të gjitha partive të përgjegjshme për këtë qëllim", shprehet ambasada e SHBA- ve. Në të njëjtën linjë ishte edhe delegacioni i Bashkimit Europian në Tiranë. "Në përgjigje të raportimeve që qarkullojnë në media, dëshirojmë të sqarojmë se ndërkohë që BE- ja nuk është e përfshirë në asnjë ndërmjetësim, qëndrimi ynë mbetet i njëjtë; vazhdojmë të theksojmë nevojën për të ndjekur rekomandimet e OSBE/ ODIHR. Siç e kemi thënë edhe më parë, përfshirë edhe Raportin e vitit 2023 për Shqipërinë, reforma zgjedhore kërkon dialog politik konstruktiv dhe gjithëpërfshirës të të gjitha palëve", shprehet zyra e BEsë në Tiranë. Pas këtyre deklaratave që me gjasa nuk i kanë pëlqyer Lulzim Bashës, nëpërmjet zëdhënësit për shtyp, ka akuzuar mediat se kanë dezinformuar duke mohuar dhe fjalët që ai vetë ka thënë në publik. Partia Demokratike hedh poshtë aludimet dhe dizinformimin lidhur me qëndrimin e kryetarit të Partisë Demokratike z. Lulzim Basha të bëra nga "Balkanweb", "News 24" dhe gazeta "Panorama". Z. Lulzim Basha një ditë më parë ka falenderuar për bashkëpunimin partnerët ndërkombëtarë për rinisjen e punës së Reformës Zgjedhore. "Keqinformimi bëhet thjesht dhe vetëm për interesa të një grupi që nuk e do Reformën Zgjedhore. PD falënderon dhe njëherë partnerët tanë SHBA- të, BE- në, Britaninë e Madhe dhe OSBE ODHIR për mbështetjen e Reformës Zgjedhore si interes i qytetareve shqiptarë dhe mundësi për të grantuar zgjedhje të lira dhe të ndershme", shprehet PD. Lulzim Basha deklaroi ditën e hënë jashtë sallës së Parlamentit se në bashkëpunim me partnerët ndërkombëtarë ka arritur që të bindë palën tjetër ( Partinë Socialiste) për ring
ritjen e Komisionit Bipartizan të Reformës Zgjedhore. Madje Lulzim Basha gjatë fjalës së tij, specifikoi disa herë, nderkombetarët ndihmuan dhe bashke me ata arriti nje fitore te modeste. Ai u zotua publikisht se shumë shpejt pasi te rakordohet do bëhen detajet publike per mediat. Basha ka theksuar më tej se: "Në bashkëpunim
me faktorin ndërkombëtarë përfaqësuesit e të cilit dëshiroj t'i falënderoj ja kemi dalë të ndërmarrim një hap të parë modest sa i takon prioritetit kryesor për largimin e papërgjegjshmërisë politike nga skena politike nga skena politike përmes Reformës Zgjedhore. Dhe të paktën për momentin duhet që në bashkëpunim me aleatët strategjik
të Shqipërisë, Partia Demokratike si udhëheqëse e këtij procesi në kuptimin thelbësor të fjalës ia ka dalë që të bind palën tjetër për të nisur punën për Komisionin bipartizan të Reformës Zgjedhore". Më tej, ai citoi dhe Ambasadat të cilat sipas tij ndihmuan PD- në që të arrinte që ka lidhje me reformën zgjedhore. "Detajet
besoj do të bëhen shumë shpejt publike, por unë dua të falënderojë SHBA, BE, Britaninë e Madhe që kanë ndihmuar jo thjesht opozitën, Partinë Demokratike në këtë drejtim, por edhe një interes publik të jashtëzakonshëm që është shkatërrimi i skenarëve për të zvarritur edhe një herë procesin e Reformës Zgjedhore", theksoi Basha.