Reforma Zgjedhore, kryetarja e OSBE takon Gjiknurin dhe Alibeajn
Kryetarja në detyrë e OSBE- së në vendin tonë, Clarisse Pasztory, takoi dje dy bashkëkryetarët e komisionit për Reformën Zgjedhore, Damian Gjiknuri dhe Enkelejd Alibeaj. Lajmin e konfirmoi vetë Pasztory në Facebook, ku shkruan se mirëpret rifillimin e punës dhe përshpejtësimin e saj për reformën zgjedhore. "U takova sot me bashkëkryetarët e komisionit të posaçëm për reformën zgjedhore, Damian Gjiknuri dhe Enkelejd Alibeaj. Mirëpres rifillimin e punës përmbajtësore të premten dhe përshpejtimin e saj javët e ardhshme, me ndihmë dhe ekspertizë nga Prezenca e OSBE- së në Shqipëri dhe OSBE/ ODIHR", shkruan Pasztory. Ndërkohë, Pasztory paralajmëroi se gjatë ditës së nesërme do të ketë takime me përfaqësues të tjerë politikë. "Do të vazhdojmë takimet gjithëpërfshirëse për këtë reformë të rëndësishme, gjatë ditëve në vijim", theksoi diplomatja Pasztory. Në një postim në "Facebook", Gjiknuri zbardhi disa nga çështjet të disktuara në këtë takim. "Pata kënaqësi të takoja sot përfaqësuesit e zyrës së OSBEsë në Shqipëri, me të cilët diskutuam mbi procesin e Reformës Zgjedhore, rifillimin e punës në Komisionin e
Posaçëm Parlamentar me synim adresimin në ligjin elektoral të rekomandimeve të OSBE/ ODIHR dhe vendimeve të Gjykatës Kushtetuese", shkruan Gjiknuri. Më tej në postimin e tij, Gjiknuri shkruan se ju ka shprehur gatishmërinë për të vazhduar angazhimin përmes ekspertizës më të mirë nga ODIHR, për të cilën thotë se do të ndihmojë komisionin për të arritur zgjidhjet e duhura teknike në funksion të adresimit të plotë të rekomandimeve. "I falënderova për mbështetjen e deritanishme dhe për gatishmërinë për të vazhduar këtë angazhim edhe më tej, përmes ekspertizës më të mirë nga ODIHR, e cila do të ndihmojë komisionin për të arritur zgjidhjet e duhura teknike në funksion të adresimit të plotë të rekomandimeve", shkruan Gjiknuri.