Reforma Zgjedhore, Bardhi me përfaqësuesen e OSBE: “Rifillimi i punës”, një tallje e madhe

Përfaqësuesja e OSBE në Tiranë takoi dje edhe kreun e Grupit Parlamentar të PDsë Gazment Bardhi. Ky i fundit përmes një postimi në rrjetin social “X” bën me dije se çfarë komunikuan me Clarisse Pasztory- n sa i takon Komisionit të Reformës Zgjedhore. “Riktheksova se për opozitën Reforma Zgjedhore është një pritoritet absolut, që është bllokuar prej 2 viteve dhe po vazhdon të mbahet e bllokuar nga Edi Rama, duke mos lejuar përfaqësimin proporcional të opozitës në këtë Komision. E informova se për opozitën është një tallje e madhe me shqiptarët farsa e ‘ rifillimit të punës’ vetëm nga mazhoranca, pa respektuar vullnetin e opozitës, duke ripërsëritur gjërat që u bënë njëherë si farsë edhe 2 vite më parë”, tha Bardhi. Sipas tij, puna e këtij komisioni të rëndësishëm është “ngrirë” për rreth dy vite, duke e cilësuar shkresën e Gjiknurit dhe Alibeajt si një tjetër farsë. Kreu i grupit të PD- së shton se duhen adresuar problemet reale të zgjedhjeve në vend. “Tentativa për të ripërsëritur të njëjtin skenarë si ai i vitit 2020 për një reformë zgjedhore pa konsensusin opozitës, do të minonte zgjedhjet e ardhshme ende pa nisur. Që reforma të jetë konsensuale, gjithëpërfshirëse dhe të adresojë problemet reale të zgjedhjeve, është e nevojshme që përfaqësuesit e opozitës të kenë besimin e deputetëve të opozitës, dhe jo të jenë aty si shprehje e vullnetit të Edi Ramës apo një minorance që ka mandate nga populli opozitar, por vepron e shkëputur nga interesi i popullit opozitar. Konsensus dhe gjithëpërfshirje me vullnet të njëanshëm të Edi Ramës nuk mund të ketë dhe nuk do të ketë”, u shpreh Bardhi.