Matura 2024, nisin aplikimet për formularët, afatet

Nga 22 janari deri në 7 shkurt, kalendari me datat për drejtoritë arsimore

Teksa afrohet gjysma e vitit shkollor, nisin edhe ethet e Maturës Shtetërore.

Krahas orëve përgatitore për provimet, maturantët duhet të kryejnë brenda afatit plotësimin e formularëve A1\ A1Z, ku përcaktojnë gjuhën e huaj që do të japin provim, lëndën me zgjedhje dhe nëse kanë ndërmend të vijojnë studimet në vend apo në një prej universiteteve jashtë. Të dhëna këto që ndihmojnë në nxjerrjen e diplomës së maturës dhe përgatisin terrenin për Formularin A2, ku zgjidhen degët preferenciale. Afati nis vetëm pas disa ditësh, më konkretisht në 22 janar dhe zgjat deri në gjysmë të muajit shkurt në të dy portalet e aplikimeve, si nga maturantët e rinj dhe ata të viteve të kaluara. "Maturanti/ kandidati bën aplikimin online fillimisht në portalin qeveritar ' e- Albania' në periudhën 22 janar - 13 shkurt 2024 dhe më pas në portalin ' e- Matura' në periudhën 23 janar - 14 shkurt 2024, sipas kalendarit të publikuar nga QSHA", citon Drejtoria e Përgjithshme e Arsimit Parauniversitar. Gazeta sjell përbri kalendarin me datat e aplikimit për secilën drejtori arsimore.

PROCEDURA E APLIKIMIT

Brenda pak ditëve do të bëhet publik edhe formulari A1\ A1Z përmes të cilëve maturantët do të plotësojnë vendet bosh me gjeneralitetet ose të dhënat personale, të dhënat shkollore dhe të dhënat lëndore. Formularin A1 e plotësojnë maturantët e këtij viti shkollor. Formularin A1Z e plotësojnë të gjithë kandidatët që duan të aplikojnë në Maturën Shtetërore.

Për të bërë aplikimin nevojitet së pari një llogari në e- albania, përmes të cilit merret shërbimi i "maturës shtetërore". Maturanti/ kandidati logohet

tek "e- Albania" zgjedh shërbimin elektronik "Matura Shtetërore" dhe më pas zgjedh llojin e formularit të aplikimit ( maturantët duhet të zgjedhin A1, ndërsa kandidatët A1Z). Pasi përfundon me sukses aplikimin në portalin http:/ / ëëë. e- albania. al, maturanti/ kandidati paraqitet pranë shkollës për të përfunduar dhe konfirmuar aplikimin. Për maturantët/ kandidatët të cilët nuk janë të pajisur me mjet identifikimi të Republikës së Shqipërisë bëhet i mundur aplikimi në Maturën Shtetërore duke e plotësuar formularin A1/ A1Z në shkollën përkatëse nëpërmjet portalit "matura. akp. gov. al". Aplikimi konsiderohet i përfunduar dhe i konfirmuar vetëm në momentin kur formulari printohet nga portali i maturës. Pas plotësimit të formularit bëhet korrigjimi i pasaktësive, sipas një formulari të dërguar në shkollë nga QSHA- ja për këtë qëllim.