Për Brojën futet edhe Uolvesi, Çelsi "tundohet" ta shesë
Uest Hemi dhe Fulhami e kanë kërkuar gjithashtu
Uolves e ka identifikuar sulmuesin e Çelsit, Armando Broja, si një objektiv të mundshëm në merkaton e janarit, raporton gazeta "The Guardian".
Marrëveshja, sipas prestigjiozes britanike, do të bëhej më e mundshme nëse blutë e Londrës nënshkruajnë me një tjetër sulmues këtë merkato, me Çelsin që ka një interes për sulmuesin nigerian të Napolit, Viktor Osimhen, Evan Ferguson të Brajtonit dhe Xhon Duran të Aston Vilës. Broja ka shënuar vetëm një gol për Çelsin në 13 ndeshje këtë sezon në Premier Ligë ( kundër Fulhamit), por edhe një në Kupën FA, kundër Prestonit në raundin e 1/ 32- tave të kompeticionit më të vjetër futbollistik në botë. Uest Hemi dhe Fulhami janë dy klubet që interesohen për shërbimet e sulmuesit shqiptar, kartoni i të cilit mendohet se vlerësohet nga Çelsi me 30 milionë paund. Ndërkohë që "The Athletic" e konfirmon interesin e fundit të "ujqërve" dhe zbulon gjithashtu se në "Stamford Bridge" do të ishin të gatshëm që të jepnin dritën jeshile për shitjen e tij, pavarësisht se deri tani kishin menduar për të mos e humbur talentin e akademisë. Më herët, ata kishin marrë në konsideratë vetëm mundësinë e një huazimi. Dhe për më tepër, largimi i mundshëm i tij nuk ka të bëjë me transferimin apo jo të një tjetër sulmuesi këtë muaj. Trajneri Mauricio Poçetino, ka nisur të bëjë sërish llogaritë me transferimin e kësaj vere, Kristofer Nkunku, i cili rikthehet në stërvitje këtë javë pas një tjetër dëmtimi. Ishtalenti francez i Lajpcigut u dëmtua rëndë në gju në fazën përgatitore, pak ditë pasi ishte transferuar në Londër dhe mundi të rikthehet vetëm në fund të muajit të shkuar. Por ai u detyrua të rikthehet në infermieri dhe lënë zbuluar repartin ofensiv me vetëm Brojën dhe Xheksonin në dispozicion. Por ky i fundit është larguar drejt Kupës së Afrikës, duke e lënë repartin e sulmit sërish të varfër në numra.