Athina bllokon partneritetin BE- Shqipëri për mbrojtjen
“Kathimerini”: Si u “përplas” Italia me Greqinë për Tiranën
Greqia duket e vendosur që “inatin” për çështjen Beleri t’ia nxjerrë Shqipërisë në çdo strukturë ku ka një votë të rëndësishme. Siç po mban peng hapjen e kapitujve të anëtarësimit, ajo ka mbajtur qëndrim bllokues për Shqipërinë edhe në takim të nivelit teknik në Bruksel ku është diskutuar për arritjen e disa marrëveshjeve bashkëpunimi me vende brenda dhe jashtë unionit në fushën e mbrojtjes dhe sigurisë. Gazeta greke “Kathimerini”, shkruan se për rajonin tonë është propozuar nënshkrimi i një marrëveshje mes BE- së dhe Shqipërisë, për të krijuar partneritet, mbrojtje në Ballkanin Perëndimor, derisa rajoni të integrohet në Bashkimin Europian. Por Greqia ka kundërshtuar propozimin e emrit të Shqipërisë, pavarësisht mbështetjes së fortë që ka pasur nga Italia. Si kundërpropozim, Greqia ka vendosur në tavolinë emrin e Maqedonisë së Veriut, por propozimi grek është kundërshtuar prerazi nga Brukseli. Marrëveshjet e partneritetit të BE- së me vendet e treta janë pjesë e kuadrit më të gjerë të Kompasit Strategjik për vitin 2030, i cili do të shërbejë për të vlerësuar aftësinë e Evropës për të luajtur apo jo një rol në zhvillimet gjeopolitike. Përsa i përket çështjes Beleri, “Kathimerini” shkruan se pas dështimit të zgjidhjes së tentuar nga Kryeministri Rama, çështja është në ngërç deri më 25 janar, kur pritet të rifillojë gjyqi i kryebashkiakut të zgjedhur të Himarës. Gazeta shkruan se në prapaskenë kontaktet vazhdojnë, gjithmonë me kushtin e Greqisë që Beleri të betohet. Vlen të theksohet se marrëveshjet e partneritetit të BE- së me vendet e treta nuk janë një zhvillim i ri, por janë pjesë e kuadrit më të gjerë të Kompasit Strategjik për vitin 2030, i cili është edhe një horizont kohor që do të gjykojë aftësinë e Evropës për të luajtur apo jo një rol në zhvillimet gjeopolitike. Partneritetet janë të tre niveleve. E para ka të bëjë me bashkëpunimin me organizata të tilla si NATO, OKB dhe shoqata rajonale si OSBE, Bashkimi Afrikan dhe ASEAN ( Azia Juglindore). E dyta ka të bëjë me bashkëpunimin me partnerë strategjikë, si SHBA, Britania e Madhe, Norvegjia dhe Kanadaja, me të cilët BE, në një mënyrë ose në një tjetër, tashmë është duke punuar. Dhe niveli i tretë, i cili përfshin edhe Ballkanin Perëndimor ( së bashku me Afrikën dhe Amerikën Latine), ka në radhë të parë bashkëpunimin në misionet e CSDP ( Politika e Përbashkët e Sigurisë dhe Mbrojtjes) por edhe zhvillimi i aftësive të përbashkëta.