Nga Shkodra në Tiranë, sekuestrohen 2 mina me telekomandë me eksploziv C4

Policia e Tiranës pretendon se ka parandaluar një ngjarje të rëndë kriminale, ndërsa ka sekuestruar dy mina me telekomandë. Në pranga ka rënë një i ri që dyshohet se ka udhëtuar nga Shkodra në Tiranë me armët e rrezikshme në mjet. Policia ka mbajtur të fshehtë detajet e operacionit dhe ende nuk bëhet me dije nëse i riu i ka patur për të kryer ndonjë atentat apo për t'i shitur, por mësohet se ai ka bashkëpunuar me të vëllanë dhe janë fëmijët e një ish- zyrtari të lartë lokal në qarkun e Shkodrës. Burime zyrtare nga policia bënë me dije se pas hekurave shtetasi Jesar Shabaj, 20 vjeç, banues në Tiranë ( dhe në Shkodër), ndërsa në kërkim u shpall vëllai i tij, Jasar Shabaj.

Puna hetimore dhe profesionale e specialistëve të Hetimit të Krimeve të Komisariatit të Policisë nr. 3, ndjekur me metoda speciale, parandalon ngjarje të rënda kriminale që do të kryheshin me shpërthim të telekomanduar të lëndës plasëse. Gjatë hetimeve për këtë rast janë sekuestruar 2 mina me telekomandë, me eksploziv C4 me peshë 300 gram, të programuara për shpërthim në distancë, që do të përdoreshin nga dy vëllezër. Vihet në pranga njëri prej tyre, shpallet në kërkim vëllai tjetër. Shërbimet e Komisariatit të Policisë nr. 3, në vijim të punës intensive për të garantuar sundimin e ligjit në të gjithë vendin, për të parandaluar ngjarjet kriminale, si dhe për të kapur dhe nxjerrë përpara përgjegjësisë penale, shtetasit që janë rrezik për rendin dhe sigurinë publike, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, kanë organizuar dhe finalizuar operacionin e koduar "Brothers". Si rezultat u bë ndalimi i shtetasit J. Sh., 20 vjeç, banues në Tiranë ( dhe në Shkodër). Gjithashtu u shpall në kërkim vëllai i tij, shtetasi J. Sh., 23 vjeç, banues në Postribë, Shkodër. Gjatë veprimeve hetimore të kryera në kuadër të procedimit për këtë rast, janë gjetur dhe sekuestruar, në cilësinë e provës materiale, 2 mina me telekomandë, me lëndë eksplozive C4 peshë 300 gramë, të programuara për shpërthim në distancë ( të pajisura me aparat celular dhe me kapsolla detonatore), të cilat dyshohet se do të përdoreshin për kryerjen e ngjarjeve të rënda kriminale.