Preken nga projektet, lista me pronarët që shpronësohen

Mbi 285 milionë lekë fond për shpërblimin e 93 pronarëve, masa e përfitimit dhe procedura për lëvrimin e shumës

Janë dy projekte me rëndësi që iu hapet drita jeshile për vijimin e punimeve "Rehabilitimi i linjës hekurudhore Durrës - Terminali i transportit publik Tiranë dhe lidhja me Aeroportin ndërkombëtar të Tiranës ( TIA)", si dhe projekti për "Lidhjen e rrugës Transballkanike me Portin Detar", Vlorë.

Për vijimin e punimeve për këto dy investimeve cenohen pronat e 93 qytetarëve, të cilëve iu është marrë dakordësia kundrejt një shpërblimi që në total arrin shifrat e mbi 285 milionë lekëve që do të përballohet nga fondi i shpronësimeve në buxhetin e shtetit. I gjithë procesi i shpronësimeve deri në lëvrimin e kësteve sipas tabelës së mëposhtme për secilin përfitues duhet të përmbyllet brenda tre muajve. "Shpronësimi fillon menjëherë pas botimit të këtij vendimi në Fletoren Zyrtare dhe afati i përfundimit të shpronësimit është brenda 3 ( tre) muajve nga data e hyrjes në fuqi të tij. Pronarët e pasurive të paluajtshme, pronë private, të pasqyruar në tabelën bashkëlidhur këtij vendimi, kompensohen, për efekt shpronësimi, pasi të kenë paraqitur dokumentacionin justifikues për likuidim pranë Agjencisë Shtetërore për Shpronësimin. Agjencia Shtetërore për Shpronësimin kryen procedurat për likuidimin e pronarëve të shpronësuar, sipas përcaktimeve të bëra në këtë vendim", citohet në vendimin e publikuar në Fletoren Zyrtare. Sipas procedurës, Agjencia Shtetërore e Kadastrës pezullon të gjitha transaksionet me pasuritë e shpronësuara deri në momentin e realizimit të procesit të hedhjes së gjurmës së projekteve mbi hartën kadastrale dhe regjistrimin e kalimit të pronësisë për pasuritë e shpronësuara.