Ndryshimet në Ligjin e Prokurimeve, Spiropali: Transparencë në tenderë

"Teknologjia do lehtësojnë operatorët duke ulur kohën e shpenzuar dhe kostot për dorëzim të dokumentacionit të noterizuar procedurë"për çdo

Komisioni Parlamentar për Ekonominë dhe Financat nisi shqyrtimin e ndryshimeve në ligjin "Për prokurimin publik", i cili sjell një sërë risish për procedurat tenderuese.

Këtu përfshihen kritere skualifikuese për operatorët ekonomikë, duke nisur nga deklarimi i pronarëve përfitues, e deri te pagat referencë për punonjësit e tyre. Po ashtu, projektligji sjell risi edhe në drejtim të përdorimit të inteligjiencës artificiale në prokurime publike. Ndërkaq, gjatë diskutimeve në komision vëmendje iu kushtua edhe kompanive pjesëmarrëvese në garë, që janë të regjistruara në parajsa fiskale e për pasojë nuk iu njihet pronari real. Këto ndryshime vijnë me qëllim përafrimin e mëtejshëm të legjislacionit, me atë të Bashkimit Evropian.

PROJEKTLIGJI

Ministrja e Shtetit për Marrëdhëniet me Parlamentin Elisa Spiropali, e cila prezantoi p/ ligjin në Komision deklaroi se qëllimi i këtij projektligji është të përmirësojë kuadrin rregullator të prokurimit publik në Shqipëri, duke synuar përafrimin e mëtejshëm të ligjit me direktivat e BE- së, kjo edhe si pjesë e angazhimeve të marra në vijim të takimit dypalësh në kuadër të procesit "screening" për kapitullin 5 "Prokurimi publik".

Po ashtu, sipas ministres, ndryshimet vijnë edhe pas analizave mbi problematikat e dala gjatë zbatimit të këtij ligji në praktikë nga autoritetet kontraktore dhe operatorët ekonomikë, me qëllim lehtësimin e procesit të prokurimit për të gjitha palët e përfshira në të.

Ministrja vuri në dukje se p/ ligji adreson çështje të organizimit të kuadrit institucional të zhvillimit teknologjik duke prezantuar koncepte lidhur me Inteligjencën Artificiale dhe automatizimin e proceseve.

"Përmes këtij propozimi synohet përmirësimi i procesit të prokurimit publik në disa drejtime kryesore, mbi të gjitha rritet transparenca dhe eficenca në procedurat e prokurimit. Për arritjen e këtij qëllimi, ky projektligj parashikon propozimin për zhvillimin e teknologjisë së inovacionit në sistemin e prokurimit publik në disa elemetë të këtij procesi, përllogaritja e vlerës limit të kontratës, stumimi i tregut, hartimi i specifikimeve teknike dhe vlerësimi i ofertave", tha minsitrja.

Sipas saj, në projektligj prezantohet përdorimi i teknologjisë së avancuar të Inteligjencës Artificiale ( IA) dhe proceseve të robotizuara në sistemin dinamik të blerjes dhe ankandit elektronik.

"Zhvillimet teknologjike jo vetëm rrisin transparencën, por do të lehtësojnë po ashtu operatorët ekonomik duke ulur kohën e shpenzuar dhe kostot e mëparshme për dorëzim të dokumentacionit të noterizuar për çdo procedurë", theksoi ministrja.

Ajo shtoi se dokumentet do të gjenerohen automatikisht përmes ndërveprimit të sistemeve. "Është vlerësuar normimi në ligj i konceptit të sistemit elektronik të ankesave edhe menaxhimit të zbatimit të kontratave. Sistemet e reja mundësojnë zhvillimin me mjete elektronike të procesit të rishikimit administrativ në fazën e menaxhimit të kontratave publike. Përcaktohet koncepti i pasaports së prokurimit publik dhe dosjes virtuale të operatorit ekonomik që synojnë respektivisht identifikimin e të gjitha të dhënave të një procedure prokurimi dhe setin e dokumenteve të operatorit ekonomik në sistemin e prokurimit elektonik", tha ajo.