Armando në merkato? Poçetino: Nuk kemi asnjë lajm
Mauricio Poçetino u përball me mediat përpara ndeshjes vendimtare të Çelsit me Midëllsbroun sonte në mbrëmje. Blutë do kërkojnë të përmbysjen e disavantazhit 1- 0 në gjysmëfinalen e kthimit të Kupës Karabao në "Stamford Bridge". "Është një pasaportë të shkosh në finale, të vizitosh ' Uemblin'. Është një ndeshje me të vërtetë e rëndësishme për ne. Ne duhet të tregojmë se është vërtet e rëndësishme për klubin, për ne, për të gjithë. Duam të jemi në finale, por fillimisht duhet të mposhtim Midëllsbroun, një ekip shumë i mirë që në ndeshjen e parë nuk arritëm ta mundnim. Do të jetë e vështirë si pjesa e parë e ndeshjes. Ne kemi besim se mund të bëjmë një lojë shumë të mirë përpara tifozëve tanë në ' Stamford Bridge'. Ne duhet të përfitojmë nga energjia e tifozëve tanë". Një nga temat që trajneri argjentinas preku në konferencën për shtyp ishte edhe ajo e të ardhmes së Armando Brojës. Ka pasur shumë spekulime për të ardhmen e sulmuesit shqiptar, me Çelsin që tashmë duket i hapur për largimin e 22- vjeçarit që këtë muaj. I pyetur nëse ka ndonjë shans që ai të largohet përpara fundit të merkatos, Poçetino u përgjigj: "Për momentin, ( nuk ka) asnjë lajm. Aktualisht, ne nuk mund të japim përditësime në asnjë mënyrë. Është gjithçka kaq e qetë dhe mendoj se është një gjë e mirë, sepse ne po punojmë shumë mirë për momentin". Por ai nuk e përjashtoi as mundësinë e ndonjë afrimi në merkaton e këtij muaji: "Nuk ka asnjë përditësim, sepse mendoj në të njëjtën mënyrë edhe kur më pyet nëse lojtarët mund të largohen. Nuk ka asnjë lajm edhe për lojtarët që mund të vijnë".