Situata në Kosovë, KFOR: Do t'i përgjigjemi çdo kërcënimi
Kreu i KFOR- it: Vijojmë përpjekjet për të parandaluar tensionet Dialogu Kosovë- Serbi, BE: Marrëveshja është e detyrueshme në tërësinë e saj, si për Prishtinën ashtu edhe për Beogradin
Misioni i KFOR- it është i gatshëm t'i përgjigjet çfarëdo kërcënimi, ka thënë komandanti i misionit të NATO- s në Kosovë, Ozkan Ulutas.
Në një deklaratë për "Anadolu", Ulutas ka thënë se KFOR- i do të vazhdojë të ofrojë mjedis të sigurt për të gjithë njerëzit që jetojnë në Kosovë. "KFOR- i ka ofruar ambient të sigurt për të gjitha komunitetet në Kosovë për rreth 25 vjet. Do ta vazhdojmë këtë edhe më 2024. Do të vazhdojmë përpjekjet tona për të parandaluar tensionet nga eskalimet dhe dëshiroj të siguroj se jemi të gatshëm t'i përgjigjemi çfarëdo kërcënimi", deklaroi ai. Ulutas vuri në dukje se NATO- ja mbështet dialogun mes Kosovës dhe Serbisë, ndërsa ka përsëritur se e vetmja rrugë përpara është paqja dhe stabiliteti për njerëzit që jetojnë në Kosovë. Komandanti turk ka theksuar se KFOR- i do ta vazhdojë misionin në Kosovë për sa të ketë nevojë. Pas tensioneve në fund të vitit, Ulutas ka thënë se KFOR- i ka katërfishuar personelin në veri dhe ka trefishuar patrullimet. Misioni në Kosovë përbëhet prej më shumë se 4500 personash nga 27 shtete. Turqia ka marrë komandën më 9 tetor, për herë të parë.
DIALOGU
Zëdhënësi i BE- së, Peter Stano, ka thënë se marrëveshja e Brukselit dhe aneksi për zbatimin e saj është e detyrueshme në tërësinë e saj, si për Kosovën ashtu dhe për Serbinë. Deklaratat Stano i ka bërë pasi BE ka konfirmuar pranimin e një versioni përfundimtar të letrës nga kryeministrja serbe, Ana Bërnabiç, përmes së cilës ishte zotuar se Serbia nuk e zbaton nenin që obligon palët të mos e pengojnë njëra- tjetrën në arenën ndërkombëtare. Megjithëse nuk e kanë zbardhur përmbajtjen finale të dokumentit, në BE kanë thënë se Marrëveshja Bazë dhe Aneksi për zbatimin e saj janë obliguese. Ishte Serbia që përmes një letre nga kryeministrja Ana Bërnabiç, e njoftoi BE- në se nuk merr përsipër zbatimin e të gjithë marrëveshjeve. Serbia ka kundërshtuar nenet që i kërkojnë të mos e pengojë Kosovën për anëtarësim në organizata ndërkombëtare. "Në përgjithësi, ne nuk e komentojmë përmbajtjen e korrespondencës me BE- në. Megjithatë, mund të konfirmojmë se BE- ja ka marrë një version përfundimtar të letrës nga kryeministrja serbe, Bërnabiq. Bashkimi Evropian përsërit se Marrëveshja është e detyrueshme në tërësinë e saj për të dyja palët. Zbatimi i saj do të jetë pjesë integrale e rrugës së tyre përkatëse evropiane". "Marrëveshja me aneksin e saj të zbatimit është bërë ligjërisht e detyrueshme përmes deklaratës me shkrim të përfaqësuesit të Lartë të BEsë për politikë të jashtme dhe siguri, të datës 18 mars 2023. Ky ka qenë qëndrimi konsistent i BE- së, i cili gjithashtu është komunikuar publikisht në disa raste", deklaroi Stano për Koha. net. BE- ja pret nga palët që të demonstrojnë përkushtim serioz dhe përpjekje për të arritur kompromisin që çon përpara normalizimin e marrëdhënieve. "Ato ( palët) duhet të mbështesin angazhimet e tyre të dialogut dhe të angazhohen për zbatimin e plotë të të gjitha marrëveshjeve nga dialogu i kaluar, në veçanti Marrëveshjen për Rrugën drejt Normalizimit dhe Aneksin e Zbatimit të saj". "Normalizimi i marrëdhënieve është një kusht thelbësor në rrugën evropiane të të dyja palëve dhe të dyja rrezikojnë të humbasin mundësi të rëndësishme në mungesë të përparimit", theksoi Stano.