Berisha paralajmëron Ramën: Ne për votën do t’i marrim kokën çdo armiku

Ish- kryeministri Sali Berisha, i cili ndodhet në arrest shtëpie, i ka dërguar një mesazh kryeministrit Edi Rama. Berisha në një fjalimi të mbajtur për protestuesit poshtë banesës së tij, tha se ‘ demokratët do t’i marrin kokën çdo armiku të votës së tyre’. Gjithashtu, ish- kryeministri thekson se populli opozitar është i gatshëm për çdo sakrificë. “Ka pasur kohë që kjo parti është përballur me dhunues zgjedhjesh, është përballur me banda, por ajo kohë, në atë kohë kjo parti doli me një moto: kush prek votën, prek kokën! Edi Rama e mbante mend atë kohë, Edi Rama e kuptoi se ne për votën ishim dhe mbetemi të gatshëm për çdo sakrificë. Se ne për votën, kemi vetëm himnet e lirisë. Se ne për votën, do t’i marrim kokën çdo armiku të votës sonë. Edi Rama, Rruga e Shpresës, banorët e saj, demokratët dhe populli opozitar, të kanë dënuar ty për kufomë politike. Mos mendo më kurrë se do mund të vazhdosh pushtetin tënd të krimit. Ke zgjedhur rrugën e burracakut, e hajdutit, e frikacakut. Ke përdorur mercenarë, ke përdorur grupe të organizuara kriminale në institucionet tua. I ke ndërsyer ata si cackej kundër opozitës. Por opozita nuk mund të mposhtet, aq sa mund të mposhtet e drejta e një kombi për të votuar i lirë”, tha Berisha. Duke i përshëndetur protestuesit, Berisha akuzoi kryeministrin Edi Rama se me institucionet dhe me shërbimin sekret, si dhe me SPAK e gjykata, po sulmon opozitën. “Opozita nuk mund të mposhtet, aq sa mund të mposhtet e drejta e një kombi për të votuar i lirë”, - tha Berisha.