Investimet, SHBA- të: Thellojmë bashkëpunimin me Shqipërinë

Rritja e investimeve ekonomike, Wisner takon ministrin Mete

Thellimi i bashkëpunimit ekonomik mes Shqipërisë dhe Shteteve të Bashkuara të Amerikës dhe rritja e mëtejshme e investimeve amerikane në vendin tonë ishin në fokus të takimit të zhvilluar mes ministrit të Financave dhe Ekonomisë, Ervin Mete dhe të ngarkuarit me punë në Ambasadën e SHBA- ve, David Wisner. Ministri i Financave dhe Ekonomisë vlerësoi mbështetjen e vazhdueshme amerikane në zbatimin e reformave të nisura në një sërë sektorësh, përfshirë këtu edhe mbështetjen financiare të USAID, apo përmes ekspertizës në disa fusha. E pranishme në këtë takim ishte edhe drejtuesja e lartë e Agjencisë së Shteteve të Bashkuara për Zhvillim Ndërkombëtar ( USAID), zj. Mischere Kawas. Ministri Mete dhe i ngarkuari me punë në Ambasadën e SHBA në Tiranë, z. Wisner ndanë interesin e përbashkët për të rritur bashkëpunimin dhe marrëdhëniet ekonomike mes dy vendeve. Ministri i Financave theksoi se qeveria shqiptare mirëpret rritjen e investimeve amerikane në Shqipëri, në sektorë prioritarë të ekonomisë. Gjatë takimit u vlerësua edhe mbështetja financiare që qeveria e SHBA- ve jep për vendin tonë përmes USAID në fusha si energjia, infrastruktura e bujqësia, me kontribut të drejtpërdrejtë në rritjen e qëndrueshme ekonomike. Që nga viti 1992, USAID, siç njofton zyrtarisht në faqen e tij zyrtare ka investuar mbi 500 milionë dollarë në Shqipëri, duke dhënë mbështetje në disa sektorë prioritarë. Ervin Mete u shpreh se qeveria shqiptare mirëpret rritjen e investimeve amerikane në Shqipëri në sektorë të ndryshëm të ekonomisë. Bashkëbiseduesit theksuan rëndësinë për të thelluar më tej bashkëpunimin dhe marrëdhëniet mes dy vendeve, edhe si aleatë në NATO. Në këtë drejtim, i ngarkuari me punë në Ambasadën e SHBA- ve në Tiranë, Wisner shprehu gatishmërinë për të vijuar mbështetjen për Shqipërinë, e cila në buxhetin e vitit 2024 për sektorin e mbrojtjes arriti për herë të parë 2% të GDPsë si angazhim ndaj NATOs. Gjithashtu, Wisner rikonfirmoi vijimin e mbështetjes së SHBA- ve për Shqipërinë përmes programeve të financimit të USAID, ku parashikohet një marrëveshje e re me Qeverinë shqiptare për një sërë projektesh.