Parlamenti italian miraton marrëveshjen me Shqipërinë

Pakti Rama- Meloni, “Kushtetuesja” shprehet të hënën, gjykata: U paraqitë n prova shtesë në seancë

Dhoma e Deputetëve në Itali i dha dritën jeshile projektligjit për ratifikimin e protokollit Itali- Shqipëri për qendrat e emigrantëve.

Votat pro ishin 155, kundër 115 dhe dy abstenime, ndërsa tashmë projektligji do të kalojë në senat. Kundër projektligjit për ratifikimin e marrëveshjes ka pasur shumë deputetë, të cilët dhe kanë mbajtur fjalime duke dhënë argumentet e tyre. “Me marrëveshjen Itali- Shqipëri, politika e imigracionit e qeverisë Meloni shënon një tjetër fazë diskriminuese dhe jopërfundimtare. Është një projekt plot boshllëqe, i mirë vetëm për propagandën e zgjedhjeve të ardhshme europiane, kur mazhoranca do të përpiqet të besojë se asnjë emigrant nuk do të mbërrijë më në Itali. Por është thjesht një gënjeshtër, një tjetër mashtrim: flukset migratore mund dhe duhen menaxhuar, por nuk mund të bllokohen. Kjo është një marrëveshje shumë e shtrenjtë, ndërsa në vendin tonë të ardhurat u mohohen njerëzve në vështirësi dhe shumë nuk mund të marrin më mjekim, të paktën 670 milionë euro shpenzohen për menaxhimin e jo më shumë se 3 mijë emigrantëve në muaj në territorin shqiptar”, - kështu u shpreh Laura Boldrini, deputete e PD- së dhe kryetare e Komisionit të Përhershëm të Dhomës për të drejtat e njeriut në botë, duke deklaruar në sallë votën e Partisë Demokratike kundër ligjit të ratifikimit. “Qeveria Meloni ka dështuar në politikat e migracionit. Ka rritur jo vetëm taksat, por edhe zbarkimet”, - tha deputetja e Viva Italia, Maria Elena Boschi. Parlamenti italian i jep dakordësinë e parë marrëveshjes me Shqipërinë për emigrantët e jashtëligjshëm. Dhoma e Ulët, ajo e deputetëve miratoi me 155 vota “Pro”, 115 “Kundër dhe 2 abstenime marrëveshjen e nënshkruar në Romë më 6 Nëntor nga kryeministrat Rama e Meloni, për ngritjen e një qendre pritjeje për azilkërkuesit për llogari të Italisë në territorin shqiptar. Marrëveshja parashikon ngritjen e një kompleksi për pritjen e jo më shumë se 3 mijë emigrantëve. Kompleksi përfshin një zyrë regjistrimi në

Portin e Shëngjinit, ku mbërrijnë emigrantët që shpëtohen në ujërat mesdhetarë përballë brigjeve italiane dhe akomodimin e tyre në kampin që do të ngrihet në ish- bazën ushtarake ajrore të Gjadrit, ku ata do të strehohen gjatë periudhës së kryerjes së procedurave, ku vlerësohet nëse plotësojnë apo jo kriteret për të përfituar azil në Itali. Administrimi i qendrës do të kryhet plotësisht nga qeveria italiane, ndërsa pala shqiptare është përgjegjëse vetëm për sigurinë e jashtme. Ndërtimi i strukturave nis që këtë vit, ndërsa funksionimi zgjat për 4 vite duke nisur nga 2025- a. Miratimin përfundimtar, marrëveshjes pritet tashmë t’ia japë edhe senati italian. Kurse Gjykata Kushtetuese në Shqipëri do të shprehet ditën e hënë për marrëveshjen që Shqipëria ka firmosur me Italinë për marrjen e emigrantëve. Në një njoftim zyrtar, gjykata shprehet se në seancën e djeshme, grupi prej 30 deputetësh të opozitës që ka bërë ankesën ka parashtruar prova të shtesë të cilat ua janë vënë për dijeni edhe palëve. Marrëveshja do të votohej në dhjetor në Parlament, por u pezullua për shkak të vendimmarrjes së Gjykatës Kushtetuese. Gjykata Kushtetuese ka vendosur të shtyjë seancën, në të cilën është duke shqyrtuar marrëveshjen mes Italisë dhe Shqipërisë për çështjen e kampeve të emigrantëve. Kushtetuesja njoftoi se seancë e radhës do të zhvillohet më datë 29 janar në orën 10: 00.