Seanca zgjat 12 minuta! Mes zhurmës, PS voton 10 projektligje në Kuvend
“Edhe Rama, në burg si Mcgonigal”, Salianji: Nuk tërhiqemi, s’ka për të pasur Parlament normal pa u plotësuar tri kërkesat tona
Mes zhurmës së bilbilave, u votuan dje me shpejtësi disa ndryshime në akte normative dhe marrëveshje ekonomike në sallën e Kuvendit.
Opozita vijoi me aksionin e saj, por këtë herë pa ndezur tymuese dhe pa bllokuar foltoren. Opozitarët zgjodhën një formë më të sofistikuar për të vijuar me mosbindjen e tyre në Parlament. Edhe pse nuk pati flakadanë, karrige grumbull e përplasje verbale, këtë herë deputetët e opozitës qëndruan në këmbë para foltores me pankarta në duar. Por ata mbushën vendet ku ulen me pankarta kundër qeverisë si dhe janë bërë rresht para foltores. “Na duhet qeveri, jo kartel”, “Vrasës i pluralizmit”, “Gjykatat e Shqipërisë, apo gjykatat e Ramës”, “Edhe Rama, në burg si Mcgonigal”, “Na ktheni atë që është e jona!”, ishin disa nga mesazhet që kanë zgjedhur. Deputetët e opozitës qëndruan para foltores me pankarta në duar, ndërsa mazhoranca votonte projektligjet. Pa diskutime mes palëve, mazhoranca votoi nen për nen 10 projektligje e 3 akte normative të parashikuara në rend dite. Ratifikimi i marrëveshjes së financimit me Francën, akti normativ për shtesa dhe ndryshime në buxhetin e vitit 2023, akti normativ për shtesa dhe ndryshime për tatimin mbi të ardhurat dhe shqyrtimi i aktit normativ për masa urgjente për trajtimin e ujërave të ndotura ishin disa nga projektligjet që morën 75 vota pro të mazhoritarëve. Po ashtu, u votua emërimi i Plarent Ndrecës. I pranishëm në këtë seancë plenare ishte dhe kryeministri Edi Rama, i cili nuk tha asnjë fjalë përveçse ngriti kartonin jeshil duke buzëqeshur. Seanca plenare zgjati vetëm 12 minuta. Kreu i grupit parlamentar të PD- së, Gazment Bardhi dhe deputeti Flamur Noka janë të përjashtuar me 10 ditë për shkak të incidenteve në sallën e Kuvendit dhe pengimin e mbledhjes së Komisionit të Medias.
REAGIMI
Deputeti demokrat Ervin Salianji bëri të qartë se opozita nuk do të tërhiqet nga beteja e saj në Kuvend. I pyetur jashtë ambienteve të Kuvendit, Salianji paralajmëroi se nuk ka për të pasur parlament normal derisa ato të realizohen. Sa i përket aksionit të sotëm opozitar, Salianji tha se ka vetëm diversifikim të saj dhe qëllimi është që me forma të ndryshme t’i tregohet opinionit se nuk po përfaqësohen interesat e qytetarëve. “Nuk ka asnjë trembje, e keni parë aksioni vazhdon po njësoj. Bllokimi i jetës parlamentare normale vazhdon po njësoj deri në realizimin e kërkesave tona. Pa diskutim që duhet të ketë diversifikim. Pa diskutim që aksioni do marrë format e veta nga java në javë. Nuk ka tërheqje nga kërkesat tona, nuk do të ketë tërheqje nga kërkesat tona dhe nuk ka për të pasur seancë dhe parlament normal derisa kërkesat tona të realizohen”, - deklaroi Salianji. Por çfarë janë kërkesat e PD- së? Salianji tha se kërkohet që PD të përfaqësohet siç duhet në Komisionin e Reformës Zgjedhore duke pasur bashkëkryetarin në radhët e saj, komisionet hetimore dhe që mazhoranca të mos hyjë në punët e brendshme të PD- së. “Po kërkojmë bashkëkryetarin e komisionit të reformës zgjedhore ashtu siç e keni parë 47 deputetë që përbëjnë shumicën e grupit parlamentar, apo grupeve parlamentare të opozitës kërkojnë që të kenë përfaqësimin e tyre në komisionin e reformës zgjedhore dhe proporcionaliteti ndërkohë është i mirëpritur. Nuk mundet që një grupim me 7 deputetë të ketë 4 përfaqësues dhe grupimet opozitare, bashkë me partinë më të madhe që është PD dhe grupi parlamentar i PD të mos ketë përfaqësimin e bashkëkryetarit. Pavarësisht se ne kemi faktuar dhe kemi bindur opinionin publik në lidhje me frikën që ka mazhoranca dhe Edi Rama për t’u përballur me hetimin parlamentar për çështje që kemi kërkuar, çka fakton që ata janë përfshirë në afera korruptive apo frikëra që duan të mbulojnë me mostransparencë apo moskontrollin dhe moshetimin parlamentar. Kërkesa tjetër që kemi është që të mos ndërhyjë në punët e brendshme të grupit parlamentar të PD- së”, - tha Salianji.
“Nuk ka asnjë trembje, e keni parë, aksioni vazhdon po njësoj. Bllokimi i jetës parlamentare normale vazhdon po njësoj deri në realizimin e kërkesave tona. Pa diskutim që duhet të ketë diversifikim. Pa diskutim që aksioni do marrë format e veta nga java në javë. Nuk ka tërheqje nga kërkesat tona, nuk do të ketë tërheqje nga kërkesat tona dhe nuk ka për të pasur seancë dhe parlament normal derisa kërkesat tona të realizohen”.