Gjysmëfitore për studentët e Mjekësisë, Kushtetuesja shfuqizon pjesërisht ligjin
"Afati 5- vjeçar më i ashpër se nevoja për të përmbushur objektivin, tejkalon gjysmën e kohëzgjatjes së studimeve"
Gjykata Kushtetuese ka shfuqizuar pjesërisht ligjin për punësimin e detyrueshëm me 5 vite për studentët e mjekësisë, çka përkthehet në një gjysmë fitore për studentët e mjekësisë.
Ligji është për interes publik, por masa e kufizimit të punësimit është më e ashpër, sipas Kushtetueses dhe ky afat nuk duhet të tejkalojë gjysmën e viteve të studimit. Ligji i miratuar me shpejtësi në mes të verës parashikonte punësimin e detyruar 5 viteve për studentët e mjekësisë të vitit të parë; 3 vite punësim i detyruar për studentët e vitit të dytë deri në vitin e katërt, ndërsa ata që ishin në vitin e 5 dhe të gjashtë të studimit parashikohej detyrimi 2 vite; këto afate ishin joproporcionale sipas gjykatës kushtetuese. Sipas vendimit në fjalë, marrëveshja e studentëve të mjekësisë me shtetin shqiptar është e pazbatueshme deri në ndërhyrjen e kuvendit për ndryshimet ligjore. Brenda tre muajsh, Kuvendi duhet të bëjë ndryshimet ligjore.
VENDIMI
Pas muajsh të tërë protestash nga ana e studentëve aspirantë për të veshur bluzën e bardhë, çështja shkoi në Gjykatën Kushtetuese e cila dha këtë të enjte vendimin final duke pranuar pjesërisht kërkesën e studentëve të mjekësisë, të cilët kundërshtojnë vendimin e qeverisë që i detyron ata të qëndrojnë në Shqipëri 2- 5 vite pas përfundimit të studimeve. Një masë kjo e iniciuar nga qeveria me qëllim për të frenuar largimin e bluzave të bardha nga vendi.
Në optikën e gjyqtarëve të Kushtetueses, këto afate janë të ashpra dhe se nuk janë proporcionale me interesin publik ndaj ka kërkuar shfuqizimin e tyre. Sipas gjykatës, duke iu referuar edhe vendeve të tjera, ky afat nuk duhet të tejkalojë gjysmën e viteve të studimit. Brenda tre muajsh, Kuvendi duhet të bëjë ndryshimet ligjore. "Gjykata Kushtetuese e mbledhur sot, më 25.01.2024, vlerësoi se dispozitat e kundërshtuara sjellin kufizim të të drejtave për arsim dhe punësim, të garantuara nga nenet 49 dhe 57 të Kushtetutës. Kufizimi është vendosur me ligj dhe për interes publik, i cili lidhet me detyrimin e shtetit për të garantuar kujdes shëndetësor ndaj shtetasve, të parashikuar nga neni 55 i Kushtetutës. Megjithatë gjatë procesit nuk u provua se kufizimi është proporcional në drejtim të afateve dhe kohëzgjatjes së shlyerjes së detyrimeve për punësim, pasi afati 5- vjeçar i parashikuar nga neni 4 i ligjit rezulton më i ashpër se sa nevoja për të përmbushur objektivin legjitim. Duke u nisur nga premisa që afati 5vjeçar nuk është proporcional dhe duke marrë në konsideratë eksperiencën e vendeve të tjera, ku ky afat nuk tejkalon gjysmën e kohëzgjatjes së studimeve, u gjykua që të rishikohen edhe afatet e tjera 3vjeçare dhe 2- vjeçare të përcaktuara në të njëjtin nen", citohet në vendimin e zbardhur ditën e djeshme në të cilin i kërkohet Kuvendit të Shqipërisë të ribëjë ligjin, por me afate të reja.