"Shqiptarë ngrihuni", Berisha: Mos prisni që SPAK ta ndëshkojë Ramën
"Deputetët në Kuvend po mbrojnë parimet e shenjta të pluralizmit" "Kërkoni drejtësi për dinjitetin tuaj", ish- kryeministri: Kemi përpara një kriminel ndërkombëtar. Të mos e mbajmë turpin në Tiranë
Lideri demokrat, Sali Berisha, u bëri dje thirrje qytetarëve shqiptarë që të ngrihen për të larguar kryeministrin Edi Rama.
Ai apeloi se duhet të kërkojnë drejtësi për dinjitetin e tyre të nëpërkëmbur. "Çfarë kemi përpara ne sot? Kemi përpara kryeministrin më të turpëruar të planetit. Kemi përpara një kriminel ndërkombëtar, që për karrigen e tij, interesa të tij personale, i korrupton vendit udhëheqës të NATO- s, i korrupton vendit të madh të lirisë, kryezbuluesin, kryembrojtësin e vet në luftën kundër korrupsionit. I korrupton atë dhe e paguan për të luftuar Sali Berishën, për të luftuar ju, për të luftuar opozitën, dhe ky përbën një krim madhor ndërkombëtar, - theksoi lideri demokrat Sali Berisha. Sipas tij, qytetarët "nuk duhet të presin që Edi Ramën ta ndëshkojë SPAK". "Edi Rama është një kriminel në kërkim, prandaj shqiptarë ngrihuni, të mos mbajmë turpin në Tiranë, se nuk ka komb të qytetëruar që do të pranonte një horr të tillë për kryeministër. Edi Rama i ka kohërat e numëruara, por ftoj shqiptarët t'i presin biletën dhe do të shihni ju se si do të bjerë bashkë me të llumi që e mban në këmbë atë. Shqiptarë, qytetare dhe qytetarë, për dinjitetin tuaj, për dinjitetin e vendit tuaj, të ngriheni në këmbë dhe të kërkoni drejtësi kundër Edi Ramës, të kërkoni drejtësi ndaj këtij kryekorruptori. Mos prisni që Edi Ramën ta ndëshkojë Damani. Damani është një skllav i tij i mjerë, është një qenie e korruptuar në çdo qelizë prej tij. Damani bën gjithçka që të prishë çdo provë, të mashtrojë me çdo akt vetëm e vetëm për të mbrojtur Ramën, sepse mbron veten e tij, është skllav i tij, është mercenar i tij", - u shpreh kreu demokrat. Berisha u ndal edhe tek aksioni opozitar, i cili ka nisur prej muajit tetor. Sipas tij, deputetët e opozitës nuk duan që të bllokojnë parlamentin, por kjo është "klithma e mosbindjes civile për të mbrojtur parimet e shenjta të pluralizmit". "43 deputetë nisën një betejë pa kthim në Parlament, një betejë për mbrojtjen e të drejtave tuaja kushtetuese. Një betejë për mbrojtjen e pluralizmit parlamentar. Kjo betejë nisi në mënyrën më të pazakonte. Me mjetet e mosbindjes civile të paparë deri në atë kohë, grumbuj karrigesh, tymuese dhe zhurmuese për t'i thënë Parlamentit monist se mbi ne nuk kalon dot kurrë. Kurse ju shihnit lakenjtë e qeverisë në studiot televizive, që shfaqeshin të turpëruar me këto akte të opozitës dhe jo me
monizmin e shëmtuar të Edi Ramës. Deputetët nuk donin të bllokonin parlamentin, por ato ishin thirrja e fuqishme, klithma e mosbindjes civile për të mbrojtur parimet e shenjta të pluralizmit, për t'ju
mbrojtur ju dhe të drejtat tuaja", - theksoi kreu i PD- së. Kujtojmë se ish- kryeministri Berisha është me masë sigurie arrest në shtëpi për dosjen e privatizimit të ish- kompleksit "Partizani".