"PS do që të kontrollojë SPAK- un", Tabaku: Grupi i punës, sulm ndaj drejtësisë
Kryetarja Komisionit të Integrimit, Jorida Tabaku, akuzoi dje mazhorancën se ka ngritur një grup pune për të suprimuar punën e parlamentit të Shqipërisë. Në një deklaratë për gazetarët, Tabaku deklaroi se kjo iniciativë e shumicës socialiste po i shpërben çdo shtylle të institucioneve në vend. "Grupi i PS po përpiqet të marrë funksione të tjera që i takojnë parlamentit. Nga parti- shtet, po kthehet edhe në parti- parlament". Sipas Tabakut, përmes ndryshimeve në Kodin e ri Penal, maxhoranca e majtë po kërkon të krijojë një mburojë politike ndaj institucioneve të drejtësisë. "E gjithë kjo përpjekje për të kontrolluar drejtësinë dhe institucionin e hetimit vjen kur në sytë të qytetarëve SPAK po vazhdon të hetojë për aferën 430 mln euro të inceneratorëve. Në një aferë ku sa më shumë gërmohen inceneratorët aq më qartazi dalin fytyrat e kryebashkiakëve dhe deputetëve të mazhorancës". Ky akt politik për Tabakun është sulmi më i hapur që u bëhet institucioneve të drejtësisë që prej reformimit të sistemit në ndryshimet kushtetuese të vitit 2016. Ajo i bëri thirrje faktorit ndërkombëtar që të reagojë duke mbrojtur demokracinë, që sipas saj, me veprimet e njëanshme të socialistëve po zeron çdo përpjekje për reformimin e drejtësisë. Pak ditë më parë kryetari socialist i Komisionit të Ekonomisë, Eduard Shalsi, sqaroi se PS ka ngritur një grup pune, i cili do të kalojë në sitë punën e Kuvendit, me qëllimi për t'i dhënë më shumë ekspertizë dhe burime njerëzore në rishikimin e ligjeve dhe procesin e llogaridhënies në Parlament të institucioneve të pavarura dhe kushtetuese, ku përfshihen dhe organet e reja të drejtësisë.