Këlliçi: Personi që do të financonte djegësin, i arrestuar në SHBA për mashtrim
Kush është Carlos Santos, drejtori i kompanisë "Ethos" me seli në San Diego, që është vënë në pranga për mashtrime miliona dollarësh
Dje, Belind Këlliçi, në një dalje publike bëri me dije se personi të cilit i është kërkuar financim për inceneratorin e Tiranës është arrestuar në Shtetet e Bashkuara të Amerikës për mashtrim.
Ai nxori të dhënat dhe shpjegoi lidhjet mes kompanive që kanë marrë pjesë në sigurimin e fondeve për të financuar djegësin e Tiranës. Në fakt, duke parë linjën në të cilën denoncon Këlliçi, vërehet se bëhet fjalë për një lidhje mes kompanisë në Holandë, "Geogenix BV", që konsiderohet edhe kompania mëmë me kompaninë në San Diego "Ethos", nga e cila pritej që të lëvrohej fondi miliona eurosh. Këlliçi tha dje se drejtori i kësaj kompanie në San Diego është vënë në pranga për mashtrim, ndërkohë që i bëri thirrje kreut të SPAK, Altin Dumanit, që të hetonte brenda vendit dhe të kërkonte të dhëna edhe jashtë vendi. Carlos Manuel da Silva Santos, të cilit edhe i referohet Këlliçi, është vënë në pranga që në mesin e muajit nëntor të vitit të kaluar, pas një sërë denoncimesh të personave të mashtruar prej tij. Arrestimi i të riut, një ekonomist që kishte tronditur Amerikën me projektet e tij, të bëra madje edhe publike, ka bërë bujë, duke pasur parasysh shumat marramendëse që ka mundur t'iu zhvatë ' partnerëve'!
DENONCIMI
Belind Këlliçi tha dje: "Më datë 21 mars të vitit 2023 kam bërë publike disa dokumente në lidhje me mungesën e fondeve për financimin e ndërtimit të inceneratorit të Tiranës. Kur u miratua kjo kontrate koncesionare, sipas propozuesve, përfitimi kryesor i shtetit ishte se kjo kompani, zotëronte me kapitale të sajat 140 milionë euro, mjaftueshëm për të ndërtuar inceneratorin të cilin shteti me fondet e tij, nuk mundej dot ta realizonte këtë vepër. Me këtë argument u përzgjodh skema e PPP. Në një dokument të datës 9 dhjetor të vitit 2022, kompania mëmë në Holandë ' Geogenix BV', i drejtohet ' Ethos Asset Management INC', me adresë San Diego Kalifornia, përfaqësuar nga Carlos Manuel da Silva Santos, të quajtur "Project summary", ku specifikon se totali i investimit për ndërtimin e inceneratorit në landfillin e Sharrës është 141 milionë euro. Faza e parë është 28 milionë euro, nga të cilat janë financuar 22 milionë euro dhe nevojiten të financohen me borxh edhe 113 milionë euro të tjera. Kur kam bërë këtë denoncim, u jam drejtuar jo vetëm organeve ligjzbatuese, por edhe qeverisë shqiptare për të prishur këtë kontrate, pasi ishte e miratuar mbi fakte të rreme dhe dokumente te falsifikuara. Zyra e Prokurorit të SHBA- ve, Distrikti Jugor i Kalifornisë, në të cilin bëhet i ditur arrestimi me datë 13 nëntor 2023, i shtetasit Carlos Manuel da Silva Santos, me funksion CEO i kompanisë Ethos Asset Management Inc., me akuzën e mashtrimit financiar dhe krimeve të tjera në bashkëpunim. Hetuesit federale që kanë bërë ndjekjen dhe me pas arrestimin e këtij shtetasi, kanë deklaruar se ky individ, vetëm 29 vjeç, është personi që ka ngritur një skemë mashtrimi ndërkombëtare në bashkëpunim dhe me individë të tjerë. Kjo çështje ende vijon të jetë nën hetim në SHBA nga Agjencia e Homeland Security Investigations. Kompania mëmë në Holandq e Inceneratorit fantazmë, "Geogenix", tashmë në pronësi të ICARE Holding dhe Franco Tossi Mecanica, i janë drejtuar këtij 29- vjeçari, tashmë me akuza zyrtare federale për mashtrim ndërkombëtar në SHBA, për të përfituar 100 milionë euro financim për ndërtimin e inceneratorit të Tiranës. I bëj thirrje urgjente sot drejtuesit të SPAK z. Altin Dumani, të shfrytëzojë të gjitha marrëveshjet që ka me Agjencitë Ligjzbatuese në SHBA e më gjerë, të nisë disa letërporosi, në shtete si Çeki, Turqi dhe Qipro, në lidhje me këto fakte.
PO KUSH ËSHTË CARLOS SANTOS?
Deri më datë 13 nëntor të vitit që lamë pas, Carlos Santos konsiderohej nga mediat amerikane si gjeniu i ekonomisë, e ardhmja konceptuale e tregut financiar etj.. Ai kishte fituar disa çmime në Amerikë dhe Portugali për talentin e jashtëzakonshëm në menaxhimin e kompanisë "Ethos", e cila sipas Këlliçit, ka marrë përsipër edhe financimin e inceneratorit të Tiranës. Por drejtori i suksesshëm i kësaj kompanie u denoncua nga disa kreditorë, të cilët vunë në lëvizje hetuesit federalë dhe ai me 12 nëntor u vu në pranga për mashtrim nëpërmjet një skeme kredie miliona dollarëshe. Mediat amerikane shkruan pas arrestimit se Santos, 29 vjeç, akuzohet për orkestrimin e një skeme mashtrimi përmes kompanisë së tij "Ethos Asset Management", e cila ofron financime për bizneset ndërkombëtare. Sipas të dhënave mediatike, saktësohet se ka pasur një sërë denoncimesh. Një prej ankesave thotë se thotë se Santos kërkonte që
huamarrësit e mundshëm të paguanin një tarifë paraprake ekuivalente me një përqindje të shumës së kredisë. Por sapo bëhej pagesa paraprake, denoncuesi thotë se "Ethos" nuk e shpërndau fondin për të, në rastin konkret huamarrësin. Hetuesit dyshojnë se Santos përdori tarifat paraprake për të shlyer huamarrësit e tjerë të mundshëm, për të paguar komisione për bashkëpunëtorët e tij dhe për të paguar shpenzimet e tij personale. Denoncimet e tjera tregojnë raste kur Santos dyshohet se përdori deklarata të rreme bankare për të fryrë aktivitetin e biznesit të tij për të mbyllur marrëveshje, ose për të hapur një linjë tjetër kredie. Në një rast në vitin 2021, prokuroria e San Diegos tregon se, "një deklaratë bankare e fabrikuar thoshte se ' Ethos' kishte pak më shumë se 100 milionë dollarë të depozituara në llogarinë bankare. Kjo deklaratë iu tregua një klienti të mundshëm që kërkonte 4 milionë dollarë financim në këmbim të një tarife paraprake prej 1 milion dollarësh për ' Ethos'. U morën të dhëna zyrtare bankare për llogarinë ' Ethos', e cila në të vërtetë kishte më pak se 1 milion dollarë të depozituara në atë kohë. Klienti i mundshëm pagoi tarifën paraprake prej 1 milion dollarësh, por nuk mori kurrë fondet e kredisë siç i ishte premtuar. Në fillim të vitit 2023, Santos dyshohet se mashtroi një viktimë tjetër duke paguar më shumë se 8 milionë dollarë tarifë paraprake. Carlos e bindi klientin se ' Ethos' kishte pothuajse 360 milionë dollarë në një llogari specifike ndërmjetësimi. Megjithatë, të dhënat tregojnë se llogaria nuk ka ekzistuar dhe llogaria tjetër e lidhur me firmën nuk ka pasur kurrë një bilanc prej më shumë se 200 mijë dollarë. Tashmë Santos dyshohet dhe po hetohet edhe për falsifikimin e bilanceve të kompanisë së tij ' Ethos' dhe pasqyrat reale të llogarisë financiare për të marrë një linjë kredie prej 14.8 milionë dollarësh nga një bankë. Deklarata e llogarisë bankare të kompanisë thoshte se kishte pothuajse 105 milionë dollarë të depozituara, por hetuesit morën deklaratën bankare që kishte një bilanc prej pak më shumë se 1 milion dollarë.