Begaj: Shqiptarët, garantë të së ardhmes në MV! Rama: Leksion i artë për brezat

Drejtues të shtetit dhe politikës në Shqipërinë uruan dje Talat Xhaferin dhe shqiptarët në MV, e cila do të ketë kryeministrin e parë shqiptar. Teksa uron Xhaferin, Presidenti Bajram Begaj shkruan se shqiptarët janë një faktor i rëndësishëm për stabilitetin dhe ardhmërinë e Maqedonisë së Veriut, duke shtuar se ky është rasti që të dëshmojnë se e shohin lidershipin vetëm në perspektivën e integrimit të vendit në BE. “Pavarësisht kufizimit në kohë dhe në kompetenca, kjo qeveri ka sfidën dhe privilegjin për të realizuar zgjedhje të lira e të ndershme për të ruajtur stabilitetin dhe kursin euro- atlantik të vendit si dhe të dëshmojë aftësinë për të qenë gjithëpërfshirëse dhe bashkëpunuese me të gjithë faktorët pa dallim politikë dhe etnikë! Shqiptarët janë një faktor i rëndësishëm për stabilitetin dhe ardhmërinë e RMV. Ky është rasti që ata të dëshmojnë se e shohin lidershipin vetëm në perspektivën e integrimit të RMV në BE. Suksese!”, - shkruan Begaj. Një leksion të artë për brezat që vijnë nga Maqedonia e Veriut e konsideron kryeministri Rama. Ai ndau një foto të Talat Xhaferit dhe Ali Ahmetit, teksa e vlerëson këtë të fundit për rolin e jashtëzakonshëm për shqiptarët në Maqedoni të Veriut. Ministri për Evropën dhe Punët e Jashtme, Igli Hasani, u shpreh besimplotë se kryeministri Talat Xhaferi dhe kabineti i tij qeveritar do të përmbushin angazhimet dhe detyrimet e programit qeveritar, si dhe vijimin e punës për realizimin e proceseve që dalin nga negociatat për anëtarësim me BEnë dhe përshpejtimi i integrimit evropian. Ministri për Evropën dhe Punët e Jashtme të Shqipërisë ka uruar Talat Xhaferin për zgjedhjen e tij si kryeministër i parë shqiptar në Maqedoninë e Veriut. Kreu i PL- së, Ilir Meta shprehet besimplotë se me lidershipin e tij, qeveria e re do të hedhë hapa të rëndësishëm në konsolidimin e një procesi zgjedhor të lirë dhe të ndershëm. Kurse sipas kryedemokratit Lulzim Basha, pa vizionin, përkushtimin dhe vendosmërinë e Ali Ahmetit, kjo do të ishte e pamundur.