Presidenti Begaj: Populli shqiptar mbrojti kauzën e humanizmit
Shqipëria, ashtu si edhe shumë vende të tjera në mbarë botën, kujtoi 27 Janarin, ditën Ndërkombëtare të Holokaustit, në nderim të mbi 6 milionë viktimave që humbën jetën gjatë Luftës së Dytë Botërore. Dita ndërkombëtare e Holokaustit këtë vit merr një rëndësi më të madhe, pasi ndërhyrja në Gaza ka rritur frymën e antisemitizmit, siç përkufizohet "urrejtje për hebrenjtë". Ministri i Punëve të Jashtme në një takim përkujtimor për këtë ditë e shikon si thelbësore të jepen mesazhe të qarta që nuk mund të ketë asnjë justifikim për antisemitizmin. "Duhet të bëjmë shumë për të edukuar shoqëritë tona kundër çdo lloj urrejtje e diskriminimi racor, fetar, etnik apo çfarëdo qoftë. Asgjë nuk mund të justifikojë asnjë lloj racizmi dhe dhune me bazë etnike dhe fetare", tha Hasani. Në aktivitetin e organizuar në Ministrinë për Europën dhe Punët e Jashtme u sollën dëshmi të familjeve hebre të ndihmuara nga shqiptarët në kohën e luftës. Kjo e bëri Shqipërinë të vetmin vend në botë që hebrenjtë pas luftës të ishin më të shumtë në numër se kur u strehuan në vendin tonë për t'i shpëtuar burgosjes dhe ekzekutimit. Një solidaritet me këtë mikpritje që bëri bashkë jo vetëm popullin, por sipas dokumentave arkivore dhe kundërshtarët politikë të kohës. Në një mesazh në rrjetet sociale, Presidenti Bajram Begaj është shprehur krenar për vlerat e popullit shqiptar, i cili kurrë nuk bëri kompromis as me jetën e tij në mbrojtjen e kauzës së humanizmit. Më tej, Presidenti Begaj shkruan se historitë e tyre, le të na shërbejnë që të kundërshtojmë urrejtjen, diskriminimin dhe çdo padrejtësi tjetër në dëm të njerëzimit. "Në Ditën e Përkujtimit të Holokaustit, ne reflektojmë mbi miliona njerëz që u persekutuan dhe u zhdukën në një prej periudhave më të errëta të njerëzimit. Krenar për vlerat e popullit shqiptar, i cili kurrë nuk bëri kompromis as edhe me jetën e tij në mbrojtjen e kauzës së humanizmit. Le të na shërbejnë historitë e tyre që të kundërshtojmë me vendosmëri urrejtjen, diskriminimin dhe çdo padrejtësi tjetër në dëm të njerëzimit", shkruan Presidenti Begaj.