Salianji: E konsiderojmë shpallje lufte dhe ne do të përgatisim përgjigjen

Pas kërkesës së grupit parlamentar të Partisë Socialiste, Sekretariati i Etikës vendosi përjashtimin me 10 ditë të 18 deputetëve të opozitës nga seancat plenare pas kaosit që u krijua në seancën e fundit, ndërsa me 20 ditë deputetin Ervin Salianji. Ky i fundit e konsideron si shpallje lufte, të cilës nuk do t’i shmangen, por do të përgatiten për t’i dhënë përgjigje. “Pasi e miratuan siç deshën rregulloren e Kuvendit pa konsensus, patronazhistët e Ramës morën një tjetër vendim turpi. Nuk është në dëshirën e asnjë pale politike të përcaktojë kundërshtarin politik, ajo caktohet me vota dhe vota e ka caktuar. Të urresh Parlamentin dhe opozitën është një akt tjetër që dëshmon mendësinë diktatoriale të Ramës. Vendimi erdhi vetëm një orë para se të mblidhej Komisioni i Etikës. E konsiderojmë se shpallje lufte, ndaj se cilës do të përgatisim përgjigjen. U bëjmë me dije partnerëve ndërkombëtarë se thirrjet e tyre të përsëritura po shpërfillen në mënyrë putiniane nga Edi Rama. Shkarkimi përkohësisht i 19 deputetëve të opozitës nuk mund të bëhet nga qeveria. I bëjmë thirrje Edi Ramës të ndalë luftën ndaj opozitës, përndryshe do t’i përgjigjemi me të gjitha format e mosbindjes civile. I bëjmë thirrje Parlamentit Europian të dërgojë në Shqipëri një mision monitorimi”, - u shpreh Salianji. Ai u shpreh se në parlament nuk do të ketë më seanca plenare deri në momentin që do të plotësohen kërkesat e opozitës. “Rama do një vend pa opozitë, ka luftuar dhe ka rritur të nënshtrojë me vullnetin e tij çdo institucion, edhe opozitën e ka pasur deri para pak kohësh. Po kërkon të ketë një Parlament pa opozitë. Përjashtohen 19 deputetë vetëm se protestojnë për të kthyer të drejtën kushtetuese. Imagjinoni kur ka paturpësinë për ta bërë këtë para publikut, e mendoni çfarë mund të bëjë me një qytetar?! Ne kemi thënë që s’do ketë seanca normale parlamentare, nëse nuk plotësohen kërkesat tonë. Format që ne kemi zgjedhur të protestojmë kanë qenë të ndryshme. Këta dua të marrin pasuri, tendera, të bëjë PPP dhe të mos kontrollohen, se po nuk folëm ne, ata nuk shqetësohen. Shqipëria po lëngon dita- ditës për largimin e njerëzve nga vendi, ne nuk kemi raportin e censit. Dihet gjë sa është numri i shqiptarëve që jetojnë këtu? Jemi në kushtet që gjithçka kontrollohet. Me gjithë instrumentet matës se demokracisë, Shqipëria është në një autokraci, ku një njeri i vetëm kontrollon të gjitha institucionet. Unë kam respekt për një pjesë të kolegëve që janë zgjedhur me votat e demokratëve. Kur ka qenë Kuvendi për të folur, keni parë ju të vijë ky zotëri në Parlament? Basha po bën opozitë parttime”, - u shpreh Salianji.