Mbylli familjen në shtëpi dhe i survejonte me kamera, gjykata mban në burg të riun

Gjykata Penale e Tiranës e ka lënë në duar të ekspertëve mjeko- ligjorë fatin e burgosjes së Jetnor Zhabolit, të riut nga Mati që pak ditë ma parë tronditi vendin me paranojat e tij. Prokuroria ka kërkuar për të masën e sigurimit me burg për një muaj, ndërkohë që gjykata ka vendosur vetëm 20 ditë, por pa kërkuar që djali i cili izoloi familjen nën monitorim të rreptë të shtrohej në spital deri në përfundim të hetimeve dhe ekspertimeve mjeko- ligjore për shëndetin e tij mendor. Jetnori ka dalë para gjykatës dje dhe ka thënë të njëjtat fjalë që ka thënë edhe në polici apo prokurori, ndërsa avokatët mbrojtës kanë parashtruar kërkesa dhe fakte konkrete që klienti i tyre ka probleme serioze. Të njëjtën gjë kanë treguar edhe nëna dhe bashkëshortja, por prokuroria ka listuar një sërë akuzash për të riun, që në një rast kthimi përgjigjeje nga Mjekësia Ligjore se Jetnori nuk ka probleme shëndetësore, ai rrezikon jo pak.

Në prezencë të psikologes, bashkëshortja e Jetnorit ka rrëfyer dramën që ka jetuar prej një viti e gjysmë. Denoncimin nuk e bëri asnjëherë pasi e donte Jetnorin. E reja ka treguar se Jetnori e ka dhunuar edhe fizikisht, për herë të fundit 2 ditë para se policia të ndërhynte në banesë dhe të zbulonte tmerrin ku jetonin 4 persona, kamera, fikse valësh, sensor dhe përgjues. Bashkëshortja e Jetnorit tregon luftën që ka bërë për ta kuruar, ndërsa nëna e Jetnor Zh., 66 vjeçe, rrëfen para hetuesve betejën për të kuruar djalin, pasi mendon se ka probleme të shëndetit mendor. 66- vjeçarja ka treguar për xhelozinë e sëmurë që e ka kapluar djalin e tij, si pasojë e së cilës bashkëshortes i ka bllokuar çdo komunikim.