Klop qetëson: Van Dajk nuk do largohet 100%
"Djemtë e duan këtë klub, situata shumë e qetë dhe stabël"
Trajneri i Liverpulit, Jyrgen Klop, thotë se njerëzit duhet "të qëndrojnë të qetë" lidhur me shqetësimet për të ardhmen e disa prej lojtarëve të klubit.
Tekniku gjerman njoftoi javën e kaluar se do të largohet nga roli i tij në fund të sezonit. Menjëherë pas këtij lajmi, kapiteni Virxhil van Dajk, i cili ka edhe 18 muaj kontratë në "Anfield" ishte i pari që tha se nuk e dinte se çfarë do të bënte në të ardhmen pas largimit të trajnerit. Por në konferencën për shtyp përpara ndeshjes së sotme me Çelsin, Klop qetësoi: "Djemtë e duan këtë vend. Unë e di këtë si fakt. Ata nuk janë me një këmbë jashtë". 56vjeçari i njoftoi pronarët për largimin e tij në verë që në nëntor, ndërsa vendimi i tij u bë publik më 26 janar. Kontratat e Mohamed Salahut dhe Trent Aleksander- Arnoldit janë planifikuar gjithashtu të skadojnë në verën e vitit 2025. Por Klop shtoi: "Klubi e dinte për largimin tim prej disa kohësh. Ata mund të kishin shfrytëzuar kohën për t'u rinovuar kontratat. Pastaj unë mund të them ' meqë ra fjala, nuk do jem më këtu' dhe ata mund të thonë ' nuk na e ka thënë këtë askush'. Nuk mund të punohet kështu, sidomos jo me marrëdhënien që kemi. Por ka mjaft kohë për të bërë gjithçka. Askush nuk duhet të shqetësohet. Unë e dija se do të ndodhte sepse ju ( media) mezi duroni për t'i bërë këto lloj pyetjesh. Ky klub është i qëndrueshëm, 100%, dhe gjithçka do të jetë mirë, jam 100% i sigurt. Duhet t'i menaxhojmë pyetjet tuaja dhe duhet të japim disa përgjigje. Njerëzve tanë unë do t'u rekomandoja të qëndronin të qetë. Nuk ka asgjë për t'u shqetësuar në këtë moment". Trajneri konfirmoi se Mohamed Salah do të humbasë dy ndeshjet e vështira kundër Çelsit dhe Arsenalit. Sulmuesi pësoi një tërheqje në muskujt e pasmë të kofshës në Kupën e Afrikës. "Mo nuk është gati për ndeshjen me Çelsin ose atë të ardhshme kundër Arsenalit", tha Klop. "Ai është i lënduar. Është një dëmtim muskulor, që kërkon kohë. Mund të kishte qenë shumë më keq, por ai nuk është i disponueshëm për momentin. Ai thjesht po bën riaftësimin e tij".