Ndryshon ligji, magjistratët me mbrojtje të veçantë
Kriteret dhe procedurat, zbardhet vendimi i qeverisë, si do të mbrohen magjistratët, familjet e tyre dhe pasuria
Në mbledhjen e fundit të Këshillit të Ministrave u miratuan kriteret dhe procedurat për mbrojtjen e magjistratëve.
Sipas këtij vendimi, magjistratit i sigurohet mbrojtje e veçantë personale, e familjes dhe e pasurisë, sipas parashikimeve të këtij vendimi, kur gjatë ushtrimit të funksionit ose për shkak të tij i rrezikohet jeta, shëndeti i tij dhe/ ose e/ i familjes, si dhe pasuria. Mbrojtje e veçantë i sigurohet edhe magjistratit që nuk e ushtron funksionin ose që ka dalë në pension, në rast se e kërkon, në rast cenimi për shkak të ushtrimit të mëparshëm të funksionit. Me mbrojtje të veçantë personale, të familjes dhe të pasurisë, sipas këtij vendimi, do të kuptohen masat me karakter organizativ e profesional, për sigurimin dhe ruajtjen e veçantë fizike, mbrojtjen e familjes e të pasurisë së magjistratit, si dhe masat e tjera që lidhen me këtë mbrojtje. Për të përfituar nga ky vendim duhet të ekzistojnë disa kushte specifike, si prania e rrethanave serioze që rrezikojnë jetën, familjen ose pasurinë e magjistratit. Prania e lidhjes shkakësore ndërmjet rrethanave serioze dhe ushtrimit të funksionit ose ushtrimit të mëparshëm të funksionit nga magjistrati. Pavarësisht mungesës së lidhjes shkakësore të përcaktuar në shkronjën “b”, të kësaj pike, magjistratit i sigurohet mbrojtje e veçantë edhe në rast të pranisë së rrethanave serioze që rrezikojnë jetën, familjen ose pasurinë e magjistratit gjatë kohës që magjistrati ushtron funksionin e tij. Kërkesa për mbrojtje i paraqitet Këshillit të Lartë Gjyqësor ose Këshillit të Lartë të Prokurorisë, sipas rastit nga subjektet e përcaktuara në pikën 4, të këtij vendimi, kur ka të dhëna të besueshme që provojnë se një magjistrati i rrezikohet jeta, familja ose pasuria.
“Me mbrojtje të veçantë personale të familjes dhe të pasurisë, sipas këtij vendimi, do të kuptohen masat me karakter organizativ e profesional për sigurimin dhe ruajtjen e veçantë fizike, mbrojtjen e familjes e të pasurisë së magjistratit, si dhe masat e tjera, që lidhen me këtë mbrojtje”.
KOMISIONI
Sipas vendimit të marrë dje nga qeveria, Komisioni për Mbrojtjen e Gjyqtarëve sa herë të konsiderohet e nevojshme, përpara përfundimit të afatit të mbrojtjes, bën verifikimin e kushteve për të përfituar mbrojtje të veçantë dhe të nevojave të sigurimit dhe në përfundim të verifikimit, Komisioni merr vendim për zgjatjen e afatit të masave të mbrojtjes, shtimin ose pakësimin e tyre apo ndërprerjen e mbrojtjes së veçantë. Po ashtu, në vendimin e publikuar nga qeveria, gjyqtari brenda 15 ditëve nga përfundimi i afatit të masave të mbrojtjes mund të paraqes para komisionit kërkesë për zgjatjen e këtij afati. Në vendimin e qeverisë saktësohet se ndryshimi është bërë në pikën 17- të të vendimit të qeverisë të 1- korrikut 2019: “Kriteret dhe procedurat për mbrojtjen e veçantë të magjistratit gjatë ushtrimit të funksionit ose për shkak të tij”. “Subjektet e përcaktuara në pikën 4, të këtij vendimi, brenda 15 ditëve nga përfundimi i afatit të masave të mbrojtjes, mund të paraqesin para komisionit kërkesë për zgjatjen e këtij afati. Komisioni mund të vendosë zgjatjen e afatit të masave të mbrojtjes kur rrethanat, për të cilat është siguruar më parë mbrojtja, vazhdojnë të ekzistojnë edhe pas përfundimit të këtij afati ose kur ka të dhëna të tjera të besueshme që provojnë se magjistratit i rrezikohen jeta, familja apo pasuria”, - thuhet në vendim. Ndërkohë që në këtë pikë, janë shtuar dhe dy pika të tjera 17/ 1 dhe 17/ 2. “Komisioni, edhe kryesisht, pas një afati prej 30 ditësh nga marrja e masave të mbrojtjes, si dhe sa herë të konsiderohet e nevojshme, përpara përfundimit të afatit të mbrojtjes, bën verifikimin e kushteve për të përfituar mbrojtje të veçantë dhe të nevojave të sigurimit. Në përfundim të verifikimit, Komisioni merr vendim për zgjatjen e afatit të masave të mbrojtjes, shtimin ose pakësimin e tyre apo ndërprerjen e mbrojtjes së veçantë”, lexohet në pikën 17/ 1. “Gjatë afatit, brenda të cilit sigurohet mbrojtja e veçantë, magjistrati, magjistrati që nuk e ushtron funksionin ose magjistrati që ka dalë në pension, si dhe familjarët e tij, janë të detyruar që: a) të bashkëpunojnë në mënyrë aktive për zbatimin e vendimit të Komisionit; b) të mënjanojnë çdo veprim ose mosveprim, që mund të rrezikojë zbatimin e mbrojtjes së veçantë apo që mund të sjellë, si pasojë, një gjendje tjetër rreziku për ta ose për jetën dhe shëndetin e shoqëruesve personalë; c) të informojnë menjëherë Komisionin për çështje që kërkohen prej tij ose për ngjarje apo ndryshime të rrethanave të jetës a veprimtarive të tij personale, si dhe për kontaktet e marrëdhëniet me të tretë, që mund të rrezikojnë zbatimin e mbrojtjes së veçantë; ç) të pranojnë, nëse është e domosdoshme për qëllimet e mbrojtjes, përdorimin në mjediset e veta të mjeteve teknike të ruajtjes, vëzhgimit dhe regjistrimit pamor dhe/ ose zanor”, - thuhet në pikën 17/ 2.